नई दिल्ली। राइजिंग स्टार्स एशिया कप 2025 में वैभव सूर्यवंशी के तूफानी प्रदर्शन से पूरा टूर्नामेंट गरमाइल बा। ओमान ए के खिलाफ भलही वैभव खाली 12 रन बना सकलें, बाकी एह 12 रन से ऊ आपन नाम एगो खास रिकॉर्ड में दर्ज करा लेलें। वैभव सूर्यवंशी अभी तक भारत तरफ से ए एडिशन में सबसे जादे रन बनावे वाला बल्लेबाज बन गइलें।
वैभव अभी ले तीन पारियन में कुल 201 रन ठोक देले बाड़ें, जवना में स्ट्राइक रेट 242.16 बा- एह एडिशन में सबसे जादे ऊ अभी तक 18 चौका आ 18 छक्का ठोक चुकल बाड़ें, ई रिकॉर्ड टूर्नामेंट में अभी तक सबसे जादे बा। ई प्रदर्शन बतावत बा कि वैभव एशिया कप Rising Stars में भारत के सुपरस्टार उभर के सामने आ रहल बाड़ें।
वैभव सूर्यवंशी बनाम माज सदाकत: रन के जंग सुरू
अब टूर्नामेंट में सबसे बड़ मुकाबला वैभव सूर्यवंशी आ पाकिस्तान शाहीन के माज सदाकत के बीच होखे वाला बा। माज सदाकत अभी तक 212 रन बना के टॉप स्कोरर बाड़ें। ऊ तीन पारियन में दुगो ताबड़तोड़ फिफ्टी मार चुकल बाड़ें।
अब सब केहू के नजर एही बात पs टिकल बा कि आखिर में सबसे जादे रन के ताज के पाई- वैभव कि माज? काहेकि दुनो टीम सेमीफाइनल में पहुंच चुकल बा आ फाइनल में भेट होखे के पूरा मौका मिल रहल बा।
भारत ए बनाम पाकिस्तान शाहीन, हो सकेला सुपरहिट फाइनल
21 नवंबर के सेमीफाइनल में भारत ए आ पाकिस्तान शाहीन आपन-आपन मैच खेले जा रहल बा। अगर दुनो टीम जीत जाली सs तs निश्चित रूप से 23 नवंबर के फाइनल में भारत-पाकिस्तान के एगो आउर सुपरहिट भिड़ंत देखे के मिल सकेला।
फैन्स त अभिये से दुआ कs रहल बा लोग कि दुनो टीम फाइनल में पहुंचे, काहेकि भारत-पाकिस्तान के मुकाबला में हमेसा से रोमांच चरम पs रहे ला। पिछला लीग मैच में पाकिस्तान भारत के 8 विकेट से हरवले रहे, बाकिर वैभव सूर्यवंशी ओ मैच में 28 गेना पे 45 रन के धमाकेदार पारी खेलले रहस।
