नई दिल्ली। अमेरिका एह दिनन भारी बर्फबारी के चपेट में बा। सोमार के दिन उत्तरी अमेरिका में मैरीलैंड से लेके मेन तक जोरदार स्नोफॉल भइल, जवना से ट्रांसपोर्ट, स्कूल आ कारोबार ठप पड़ गइल। लाखन लोगन के घर में रहे के मजबूरी हो गइल। मौसम विभाग तेज हवा आ भारी बर्फबारी के चेतावनी जारी कइले बा।
मौसम वैज्ञानिकन के मोताबिक, ई पिछिला दस साल में सबसे तेज बर्फीला तूफान हs। मेट्रोपॉलिटन नॉर्थईस्ट के कइयन गो इलाकन में 2 फीट (करीब 60 सेंटीमीटर) से जादे बरफ गिरल। कइयन गो जगह बर्फ जमला के पुरान रिकॉर्ड टूट गइल। सड़क आ रेल सेवा ठप पड़ गइल आ इहां तक कि संयुक्त राष्ट्र के सुरक्षा परिषद के बैठको टाल दिहल गइल।
कइयन गो शहरन में इमरजेंसी घोषित
अधिकारी कइयन गो शहरन में इमरजेंसी घोषित करत स्कूल बंद कs देले बा लोग। एमे न्यूयॉर्को सामिल बा, जहां छव साल में पहिलका बेर एतना भारी बर्फबारी देखे के मिलल। कइयन गो इलाकन में बिजली गुल हो गइल, जवना से लोगन के परेसानी आउर बढ़ गइल।
हालांकि, बर्फीला तूफान धीरे-धीरे उत्तर दिशा में बढ़ल आ कुछ इलाकन में असर कम भइल। मौसम विभाग बतवले बा कि हफ्ता के आखिरी में एगो आउर तूफान एह इलाका में पहुंच सकेला, जवना से फेर से भारी बर्फबारी हो सकेला।
हजारन फ्लाइट रद्द
फ्लाइट ट्रैकिंग वेबसाइट FlightAware के अनुसार, सोमार के दिन अमेरिका आवे-जाये वाली 5,600 से जादे के फ्लाइट रद्द कs दिहल गइल, जबकि मंगर खातिर 2,000 आउर फ्लाइट रोक दिहल गइल। सबसे जादे कैंसिलेशन न्यूयॉर्क, न्यू जर्सी आ बोस्टन एयरपोर्ट पs भइल। करीब 2,500 फ्लाइट देरी से चलल।
रोड आइलैंड के T.F. Green International Airport अस्थायी रूप से आपन सारा ऑपरेशन बंद कs देलस। इहां 32.8 इंच (83.3 सेंटीमीटर) बर्फ गिरल, जवन 1978 के रिकॉर्ड तुड़ देलस।
का होला ‘बॉम्ब साइक्लोन’?
मौसम विभाग एह तूफान के नॉर्थईस्ट कोस्ट पs ‘क्लासिक बॉम्ब साइक्लोन’ बतवले बा। बॉम्ब साइक्लोन तब बनेला जब 24 घंटा में तूफान के दबाव तेजी से घट जाला। ई जादेतर पतझड़ आ सरदी में तब आवेला, जब आर्कटिक के ठंडा हवा दक्षिण के गरम हवा से टकरा जाले।
Read Also: JACEE Badminton League : सीजन 5 के भव्य समापन, खेल भावना के संगे गोरखपुर में दिखल जोश
