मालगाड़ी पलटावे के साजिश: रेलवे ट्रैक पs रखल रहे तीन क्विंटल के स्लीपर, ममिला में सामिल रहे सात से आठ लोग
रायबरेली-ऊंचाहार रेलखंड पs स्लीपर रखके मालगाड़ी पलटावे के साजिश कर जांच बुध के सुरू हो गइल। सुरुआती जांच में मालगाड़ी पलटावे के साजिश में सात से आठ लोगन के सामिल होखे के अंदेशा जतावल जा रहल बा। वजह एगो स्लीपर के वजन करीब तीन क्विंटल होला। अइसन में एक-दुगो लोग स्लीपर उठाके ओकरा के रेल लाइन तक नइखे पहुंचा सकत। अइसन में जाहिर बा कि अइसन करे वालन के संख्या जादे रहे। एह साजिश के पीछे कवन-कवन लोग सामिल बा, ई पता लगावे खातिर जीआरपी, आरपीएफ के अधिकारी सिविल पुलिस के सहारा ले रहल बा।
दरअसल, सोमार के रात क्लिंकर लादके एगो मालगाड़ी प्रयागराज से रायबरेली के ओर जात रहे। एह दौरान लक्ष्मणपुर आ दरियापुर स्टेशन के बीच क्रासिंग संख्या 15 सी बेनीकामा गांव के लगे इंजन में खड़खड़ाहट के आवाज भइल रहे जवना के बाद लोको पायलट गाड़ी रोक देलस। लोको पायलट रेल के पटरी पs स्लीपर रखे के सूचना देलस। एकरा बाद आरपीएफ आ रेलवे अधिकारियन के टीम मवका पs पहुंच के जांच कइले रहे। एह दौरान ट्रेन लगभग डेढ़ घंटा मवका पs खड़ा रहल। ममिला में लोको पायलट के सूचना के आधार पs ऊंचाहार आरपीएफ थाना में अज्ञात अराजकतत्वन के खिलाफ पटरी पs स्लीपर रखल जाए के ममिला दर्ज करावल गइल।
मालगाड़ी पलटावे के साजिश के ममिला उच्चाधिकारियन तक पहुंचल तs हड़कंप मच गइल। इहे वजह रहल कि बुध के रेलवे के अलावे आरपीएफ, जीआरपी के अधिकारी इहां मवका पs पहुंचके पड़ताल कइल लो आ जाने के प्रयास कइल कि आखिर एह सबका पीछे केकर साजिश रहे। विभागीय सूत्रन के मानीं तs सुरुआती जांच में मालगाड़ी पलटावे के पीछे बड़ साजिश बतावल जा रहल बा। स्लीपर के वजन भारी होखे के वजह से एह कार्य में सात से आठ लोगन के होखे के अनुमान लगावल जा रहल बा। जांच करे मवका पs पहुंचल अधिकारी आसपास के लोगन से बातचीत कs के एह सबके पीछे कवना लोगन के हाथ बा, इहो जाने के प्रयास कइल। करीब दु घंटा तक अधिकारी मवका पs रहके हर बिंदु पs पड़ताल कइल लो।
स्लीपर रखल जाये के पुष्टि ना- वरिष्ठ खंड अभियंता
वरिष्ठ खंड अभियंता (रेल पथ) इजहार कलीम बतवलें कि जांच में स्लीपर रखल जाये के पुष्टि नइखे भइल। चरवाहा लोग पटरी पs गिट्टी रखले रहे। गिट्टियके इंजन में खड़खड़ाई रहली सs। गिट्टी पिसला के निशान मिलल बा। ओहिजा, एह बाबत आरपीएफ थाना प्रभारी समर बहादुर सिंह बतवलें कि अज्ञात अराजकतत्वन के खिलाफ ममिला दर्ज कs के जांच कइल जा रहल बा।
Comments are closed.