किदांबी श्रीकांत आ प्रणय BWF Japan Open के प्री क्वार्टर फाइनल में पहुंचल लो, हार के संगे थमल आकर्षी के सफर

BWF Japan Open: भारत के स्टार बैडमिंटन खिलाड़ी किदांबी श्रीकांत आ एचएस प्रणय बीडब्ल्यूएफ जापान ओपन के प्री क्वार्टर फाइनल में आपन जगह बना लेले बा लो। श्रीकांत सिंगल्स के पहिला दौर में ताइवान के चोउ तीएन-चेन के शिकस्त देलें। ओहिजा, प्रणय चीन के ली शिफेंग के हार के स्वाद चखवलें। हालांकि, आकर्षी कश्यप के टूर्नामेंट में सफर हार के संगे थम गइल।

किदांबी-प्रणय के धमाकेदार जीत

किदांबी श्रीकांत आ एचएस प्रणय जापन ओपन के प्री क्वार्टर फाइनल में आपन सीट बुक कs लेले बा लो। पुरुष सिंगल्स के पहिला दौर में श्रीकांत ताइवान के चोउ तीएन-चेन के 21-13, 21-13 से, जबकि प्रणय चीन के ली शिफेंग के 21-17, 21-13 से हराके अंतिम-16 में जगह पक्का कइलें। क्वार्टर फाइनल में पहुंचे खातिर दुनो खिलाड़ी एक-दूसरा के सामना करी लो।

आकर्षी कश्यप के हाथे लागल हार

हालांकि, महिला बैडमिंटन खिलाड़ी आकर्षी कश्यप कुछ खास कमाल ना दिखा सकली आ उनका हार के संगे टूर्नामेंट से बाहर होखे के पड़ल। महिला सिंगल्स में आकर्षी जापान के यामागुची से पार पावे में असफल रहली आ 17-21, 17-21 से हार गइली।

महिला डबल्स में त्रीशा जाली आ पुलेला गायत्री गोपीचंद के भारतीय जोड़ी जापान के सयाका होबारा आ सुइजू के जोड़ी के खिलाफ पहिला गेम गंववला के बाद सानदार वापसी करत 11-21, 21-15, 21-14 से जीत दर्ज कइलस। मिक्स्ड डबल्स में रोहन कपूर आ एन सिक्की रेड्डी के जोड़ी ताइवान के ये होंग वेई आ ली चिया ह्सिन के जोड़ी के खिलाफ पहिला गेम के बढ़त के बरकरार ना रख सकल। भारतीय जोड़ी 21-18, 9-21, 18-21 से मुकाबला गंववलस।