सीएम सिटी में मेयर चुनाव खातिर हर वर्ग के मौका, चुनावी हलचल भइल तेज

नगर निगम के मेयर के सीट पहिला बेर अनारक्षित कइल गइल बा। एह वजह से एह बेर हर राजनीतिक दल खुश बानें। दावेदारन में भी खुशी बा। कौनो दल केहूओ के मेयर पद के प्रत्याशी बना सकsता। हालांकि, दावेदारन के संख्या अधिक होखले से सियासी दल के नेतृत्व के सोझे दिक्कतो आई। कौनो एक दावेदार के चयन कइल आसान नाइ होई।

साल 1994 में नगर निगम के गठन के बाद से मेयर के सीट तीन बार अन्य पिछड़ा वर्ग, एक बेर अन्य पिछड़ा वर्ग महिला अउर एक बेर सामान्य महिला खातिर आरक्षित रहल बा। एक बेर के छोड़ के हर बेर मेयर पद पर भारतीय जनता पार्टी (भाजपा) के कब्जा रहल बा। एक बेर ट्रांसजेंडर अमरनाथ यादव उर्फ आशा देवी मेयर बनल रहली। हालांकि, तब्बो ई सीट आरक्षित रहल। ऊ मेयर के पद जीतकर प्रदेश में कौनो नगर निगम में ट्रांसजेंडर के मेयर बने के रिकार्ड बनवले रहली।

साल 2006 के चुनाव में मेयर के पद अन्य पिछड़ा वर्ग खातिर आरक्षित हो गइल। एह बेर भाजपा से अंजू चौधरी मेयर चुनल गइली। अंजू चौधरी के कार्यकाल से अब ले नगर निगम के सीट पर लगातार भाजपा के कब्जा रहल बा।