कांतारा के सोझे पहिलही दिन फेल भइल फोन भूत, अइसन रहल राम सेतु, मिली अउर डबल एक्सएल के हाल

सुक्क के दिन बॉक्स ऑफिस खातिर बहुते खास होला। एह दिन सिनेमाघर में कई नयका फिल्म दस्तक देले। हालांकि, एह बेर के सुक्क फीक रहल। कटरीना कैफ के ‘फोन भूत’, जान्हवी कपूर के ‘मिली’ अउर सोनाक्षी सिन्हा के ‘डबल एक्सएल’ रिलीज होखले के बावजूद दर्शक सिनेमाघर के तरफ आकर्षित नाइ भइलें। तीन नया अउर अलग-अलग जॉनर के फिल्म के अइले के बावजूद बॉक्स ऑफिस पर ‘कांतारा’ के राज कायम रहल।

जान्हवी कपूर के फिल्म ‘मिली’ के क्रिटिक्स द्वारा काफी निम्मन रिव्यूज दिहल गइल रहे, जेके देख के ई मानल जात रहे कि फिल्म पहिले दिन काफी अच्छा प्रदर्शन करी। हालांकि, अइसन नाइ भइल। शुरुआती आंकड़न के मानल जाव त फिल्म अपने ओपनिंग डे पर मात्र एक करोड़ रुपया के ही कमाई कइलस। बता देईं कि एह फिल्म में जाह्नवी कपूर के अलावा सनी कौशल, मनोज पहवा, हसलीन कौर अउर संजय सूरी जइसन स्टार्स बानें। ई मलयालम फिल्म ‘हेलेन’ के हिंदी रीमेक ह, जौन 2019 में रिलीज भइल रहे।

बॉक्स ऑफिस पर सोनाक्षी सिन्हा अउर हुमा कुरैशी के जोड़ी के जादू भी नाइ चल पवलस। 15-20 करोड़ रुपया के बजट में बनल ई फिल्म पहले दिन एक करोड़ रुपया ले नाइ कमा पवलस। शुरुआती आंकड़न के मानल जाव त फिल्म पहले दिन तकरीबन 65 लाख रुपया के कलेक्शन कइले बानें  यानी फिल्म ओपनिंग डे पर अपने लागत के दस फीसदी तक नाइ कमा पवलस।

सुक्क के रिलीज भइल फिल्मन में से सबसे ज्यादा कमाई ‘फोन भूत’ के भइल। सोशल मीडिया पर आइल रिएक्शंस के मानल जाव त दर्शकन के फिल्म में कटरीना कैफ, सिद्धांत चतुर्वेदी अउर ईशान खट्टर के जोड़ी काफी पसंद आ रहल बा। इहे कारण ह कि 30 करोड़ रुपया के बजट में बनल ई फिल्म अपने ओपनिंग डे पर तकरीबन दो करोड़ रुपया के कमाई क डरलस।

ऋषभ शेट्टी के फिल्म कांतारा अब भी बॉक्स ऑफिस पर राज क रहल बा। बॉलीवुड के तीन नयका फिल्म भी कांतारा के पछाड़ नाइ पवलस अउर आलम ई भइल कि सुक्क के ई फिल्म सबसे ज्यादा कमाई कs डरलस। सामने आ रहल आंकड़न के मानल जाव त फिल्म 36वें दिन 3.55 करोड़ रुपया के कमाई कइलस।