अंतरराष्ट्रीय महिला दिवस 2025 के अवसर पs गूगल STEM (विज्ञान, प्रौद्योगिकी, इंजीनियरिंग आ गणित) क्षेत्रन में अग्रणी महिलन के उपलब्धियन के सम्मानित करे खातिर एगो विशेष डूडल प्रस्तुत कइले बा। ई डूडल ओह महान महिलन के जोगदान के उजागर करत बा, जे अंतरिक्ष अन्वेषण, प्राचीन खोजन आ प्रयोगशाला अनुसंधान में क्रांतिकारी कार्य कइले बा, जवना में भौतिकी, रसायन विज्ञान आ जीव विज्ञान के गहिराह समझ विकसित भइल बा।
गूगल अपना संदेश में कहलस, “ई डूडल अंतरराष्ट्रीय महिला दिवस के जश्न मनावत बा। संयुक्त राष्ट्र पहिला बेर 1975 में एह दिवस के आधिकारिक रूप से मान्यता देले रहे, ताकि दुनिया भर में महिलन के महत्वपूर्ण जोगदान के रेखांकित कइल जा सकी।”
हालांकि, गूगल इहो उल्लेख कइलस कि STEM क्षेत्रन में महिलन के भागीदारी अभियो सीमित बा। आंकड़न के अनुसार, वैश्विक STEM कार्यबल में महिलन के हिस्सेदारी खाली 29 प्रतिशत बा। गूगल आगे कहलस, “महिलन के ई जोगदान लैंगिक समानता के दिशा में हो रहल प्रगति के दरसावत बा, फेर STEM एगो अइसन क्षेत्र बा जहां अभियो महत्वपूर्ण अंतर बनल बा।”
अंतरराष्ट्रीय महिला दिवस के महत्व
संयुक्त राष्ट्र 1975 में पहिला बेर 8 मार्च के अंतरराष्ट्रीय महिला दिवस के रूप में मनवलस। तब से, ई वार्षिक आयोजन दुनिया भर में महिलन के सांस्कृतिक, राजनीतिक, सामाजिक आ आर्थिक उपलब्धियन के मान्यता देवे खातिर प्रेरित करत बा। एह दिन के मनावे के उद्देश्य लैंगिक भेदभाव आ असमानता के समाप्त करे आ समानता के दिशा में प्रयासन के प्रोत्साहित करे के बा।
एह साल अंतरराष्ट्रीय महिला दिवस के थीम “Accelerate Action” (कार्रवाई में तेजी ले आवे के बा), जवना के उद्देश्य महिलन के उन्नति खातिर रणनीतियन, संसाधनन आ सकारात्मक गतिविधियन के पहचानल आ ओकरा के आउर जादे प्रभावी तरीका से लागू करे के बा
