बिजनेस डेस्क: 1 अप्रिल, 2025 से नया वित्त बरिस 2025-26 के सुरुआत हो रहल बा। एह तारीख से राउर जेब आ जिनगी पs सीधा असर डाले वाला कइयन गाे बड़ बदलाव होखे वाला बा। एह दौरान टैक्स, बैंकिंग, यूपीआई, क्रेडिट कार्ड, जमा, बचत आ जीएसटी से जुड़ल नियमन में संशोधन हो रहल बा। एह बदलावन के मकसद करदाता, वरिष्ठ नागरिकन, उपभोक्तन आ बेवसायन के राहत देके खर्चा आ खपत के बढ़ावल बा, ताकि अर्थबेवस्था के रफ्तार के मजबूती मिल सकी।
एटीएम से पईसा निकालल महंगा, हर अतिरिक्त निकासी पs 23 रुपिया शुल्क
एटीएम से पईसा निकालल एक मई, 2025 से महंगा हो जाई। आरबीआई एह संबंध में एगो अधिसूचना जारी कs के एटीएम इंटरचेंज शुल्क बढ़ावे के मंजूरी दे देले बा। एह बदलाव से एटीएम के बार-बार इस्तेमाल करे वाला ग्राहक प्रभावित होई लो, काहेकि शुल्क बढ़ला से निकासी लागत बढ़ जाई। अधिसूचना के मोताबिक, एक मई से ग्राहकन के मुफ्त निकासी सीमा के बाद हर लेनदेन खातिर दु रुपिया अतिरिक्त देवे के होई। माने हर नकद निकासी पs 21 रुपिया के जगह अब 23 रुपिया शुल्क लागी। दरअसल, एटीएम से मुफ्त नकदी निकासी के एगो सीमा तय बा। मेट्रो शहरन में ग्राहक एक महीना में अपना बैंक के एटीएम से पांच बेर आ दूसरका बैंक के एटीएम से तीन बेर बिना कवनो शुल्क के पईसा निकाल सकेला। एकरा बाद ग्राहकन के अतिरिक्त शुल्क देवे के पड़ेला।
बचत आ एफडी पs ब्याज दरन में संशोधन
कइयन गो बैंक एक अप्रिल से बचत आ एफडी खाता के ब्याज दरन में बदलाव करे के घोषणा कइले बा। एकरा मोताबिक, खाता में जमा राशि के आधार पs ब्याज दरन के निर्धारण कइल जाई। माने खाता में बड़ राशि रखे वाला ग्राहकन के जादे ब्याज दिहल जा सकत बा।
न्यूनतम बैलेंस के सख्त होंगे नियम
बैंकन में न्यूनतम बैलेंस के नियम आउर सख्त होखे जा रहल बा। एसबीआई, पंजाब नेशनल बैंक आ केनरा समेत कइयन गो बैंकन के ग्राहकन के एक अप्रिल से शहरी, अर्ध शहरी आ ग्रामीण इलाकन के हिसाब से अपना बैंक खाता में न्यूनतम बैलेंस मेंटेन करे के पड़ सकत बा। अइसन ना कइला पs जुर्माना भरे के पड़ी। जुर्माना राशि बैंक खाता के श्रेणी के हिसाब से अलग-अलग होई। बैंक ग्राहकन के शहरी इलाकन में 5,000 रुपिया आ ग्रामीण क्षेत्रन में 2,000 रुपिया न्यूनतम बैलेंस रखे के पड़ सकत बा।
क्रेडिट कार्ड से जुड़ल बेनेफिट में कटौती
एसबीआई कार्ड्स एक अप्रिल से कुछ लोकिप्रय क्रेडिट कार्ड पs रिवॉर्ड पॉइंट्स घटावे के घोषणा कइले बा। सिंपली क्लिक एसबीआई कार्ड यूजर्स के स्विगी पs 10 गुना के जगह खाली पांच गुना रिवॉर्ड पॉइंट मिली। एअर इंडिया एसबीआई प्लैटिनम क्रेडिट कार्ड पs पहिले हर 100 रुपिया खर्च कइला पs 15 रिवॉर्ड पॉइंट मिलत रहे, जवन घटके 5 रह जाई। एअर इंडिया एसबीआई सिग्नेचर क्रेडिट कार्ड के रिवॉर्ड पॉइंट 30 के बजाय खाली 10 रह जाई। आईडीएफसी फर्स्ट बैंक 31 मार्च, 2025 से क्लब विस्तारा क्रेडिट कार्ड के माइलस्टोन बेनेफिट बंद करे जा रहल बा।
जीएसटी: पंजीकरण 30 दिन में
वस्तु आ सेवा कर नेटवर्क (जीएसटीएन) बेवसायन खातिर ई-इनवॉइसिंग प्रक्रिया में बदलाव कइले बा। एक अप्रिल, 2025 से, 10 करोड़ रुपिया से जादे आ 100 करोड़ रुपिया तक के सालाना कारोबार वाला बेवसायन के इनवॉइस जारी होखला के तारीख से 30 दिन के भीतर इनवॉइस पंजीकरण पोर्टल पs ई-इनवॉइस अपलोड करे के होई। वर्तमान में ई 30 दिवसीय प्रतिबंध खाली 100 करोड़ भा ओकरा से जादे वाला बेवसायन पs लागू होला। जदि कवनो ई-चालान 30 दिन के भीतर अपलोड नइखे कइल जात, तs एकरा के आईआरपी के ओर से स्वचालित रूप से खारिज कs दिहल जाई।
Read Also:
