लखनऊ : उत्तर प्रदेश विधानमंडल के बजट सत्र 9 फरवरी से सुरू होई। विधान सभा आ विधान परिषद दुनो सदन के तिथिवार कार्यक्रम जारी कs दिहल गइल बा, जवन 20 फरवरी तक चली। विधान सभा अध्यक्ष सतीश महाना सत्र के प्रस्तावित कार्यक्रम के अनंतिम मंजूरी दे देलें। अब एह कार्यक्रम पs कार्यमंत्रणा समिति के बैठक में अंतिम फैसला लिहल जाई।
सत्र के दौरान 11 फरवरी के प्रदेश सरकार वित्तीय बरिस 2026-27 के बजट विधानमंडल के दुनो सदन में पेश करी। कार्यक्रम अनुसार, सत्र के सुरुआत 9 फरवरी के राज्यपाल आनंदीबेन पटेल के अभिभाषण से होई, जवना में दुनो सदन के सदस्य मवजूद रहिहे। ओही दिन सरकार के ओर से कुछ अध्यादेश आ विधेयक सदन के पटल पs रखल जाई।
10 फरवरी के सदन में निधन के सूचना दिहल जाई। बरेली के फरीदपुर से भाजपा विधायक श्याम बिहारी लाल आ सोनभद्र के दुद्धी से सपा विधायक विजय सिंह के निधन हो चुकल बा। शोक प्रकट कइला के बाद सदन के कार्यवाही बुध तक खातिर स्थगित कs दिहल जाई।
अगिला दिन 11 फरवरी के वित्त मंत्री सुरेश कुमार खन्ना विधान सभा में बजट पेश करिहें। विधान परिषद में केशव प्रसाद मौर्य बजट रखिहें। एकरा बाद राज्यपाल के अभिभाषण पs चरचा सुरू होई, जवन सुक 13 फरवरी तक चली।
सनिचर आ अतवार के अवकाश रही। 16 फरवरी से 20 फरवरी तक बजट पs विस्तार से चरचा होई। सत्र के आखिरी दिन सदन स्थगित होखे से पहिले उत्तर प्रदेश विनियोग विधेयक पारित करावल जाई।
सत्र के दौरान मंडल आ जिला समिति के बैठक ना होई
प्रदेश सरकार विधानमंडल के बजट सत्र के दौरान मंडल आ जिला समिति के अइसन बैठक ना करे के निरदेस देलें, जवना में सांसद आ विधायक सदस्य के रूप में नामित बा लोग। संसदीय कार्य विभाग के प्रमुख सचिव जेपी सिंह बुध के सबे मंडलायुक्त आ जिलाधिकारी लोग के एह बाबत निरदेस भेज देलें। ऊ बतवलें कि एह खातिर 21 सितंबर 1998 के शासनादेश पहिले से लागू बा।
बुध के जारी आदेस में कहल गइल बा कि जदि बैठक बहुत जरूरी होखे, तs ओह समय करावल जाव जब लोक सभा, राज्य सभा आ विधानमंडल सत्र लगातार तीन दिन खातिर स्थगित होखे। ओह साथे विधानमंडल के दूनो सदन में सदस्य लोग द्वारा उठावल सवालन के सही जानकारी जिलाधिकारी आ मंडलायुक्त लोग के देवे के निरदेस दिहल गइल बा।
