अमेरिकी राष्ट्रपति जो बाइडन सितंबर में भारत यात्रा पs आ सकत बाड़ें। राष्ट्रपति बनला के बाद उनकर ई पहिला भारत यात्रा होई। अमेरिका में दक्षिण-मध्य एशिया खातिर सहायक विदेश मंत्री डोनाल्ड लू कहलें, राष्ट्रपति जो बाइडन सितंबर में भारत के यात्रा खातिर उत्साहित बाड़ें। लू इहो कहलें कि 2024 भारत-अमेरिकी रिश्तन खातिर एगो ‘बड़ साल’ होखे जा रहल बा।
ऊ कहलें कि जी-20 में भारत के नेतृत्व ओकरा के दुनिया में भलाई खातिर एगो ताकत के रूप में खड़ा होखे के ओकर क्षमता के आउर व्यापक बना देले बा। भारत जी-20 के मेजबानी अच्छा से कर रहल बा। हमनी के कइयन गो क्वाड सदस्य नेतृत्व भूमिका निभा रहल बा। ई हमनी के करीब ले आवे के अवसर मुहैया करावेला।
जलवायु संकट से निपटला में भारत के फैसला अहम
जलवायु परिवर्तन के सिलसिला में महत्वाकांक्षी लक्ष्यन के हासिल करे खातिर भारत आ आउर देसन के संगे मिलके काम करे के संकल्प जतावत डोनाल्ड लू कहलें कि एह संकट से निपटला में दुनिया के सफलता आंशिक रूप से भारत द्वारा लिहल गइल निर्णयन पs निर्भर करी।
भारत में लोकतंत्र बा काहेकि उहां प्रेस के पूरा आजादी
डोनाल्ड लू कहलें, भारत में प्रेस के स्वतंत्रता आ दुनिया के सबसे बेसी आबादी वाला देश में लोकतंत्र के समर्थन करे में पत्रकारन के भूमिका खास रहल बा। भारत में कुछुओ गुप्त नइखे रखल गइल। रउआ लगे लोकतंत्र के रूप में भारत बा काहेकि रउआ लगे स्वतंत्र प्रेस बा जवन वास्तव में काम करेले।
