UP Weather:पूर्वी यूपी में तीन दिन बाद बरखा के आसार, जानीं काहे करे पड़त बा इंतजार

UP Weather: भीषण उमस आ गरमी से बेहाल पूर्वी यूपी के लोगन के तीन दिन बाद राहत मिलला के आसार दिख रहल बा। मौसम विभाग के मानल जाव तs तीन बाद बरखा सुरू हो सकत बा।

By Anurag Ranjan On Jul 14, 2022

UP Weather: लोग परेसान बा कि मानसून यूपी तक पहुंचला के बाद अचानके कहां गायब हो गइल। भीषण उमस से लोग बेहाल बा। मौसम वैज्ञानिक लो बतावल लो कि मानसूनी हवा के दक्षिण में बनल कम दबाव के क्षेत्र खींच लेलस। इहे वजह बा कि मानसूनी धारा यूपी से खिसक के एमपी, राजस्थान कावर केन्द्रित हो गइल। नतीजा एक ओर यूपी में सूखा जइसन हालात हो रहल बा आ दूसरा ओर गुजरात से लेके राजस्थान, एमपी में जबरदस्त बरखा हो रहल बा। ओहिजा,दु से तीन दिन में पूर्वी उत्तर प्रदेश में बरखा सुरू होखे के उमेद बा

वरिष्ठ मौसम वैज्ञानिक डॉ. अतुल कुमार सिंह बतवले कि यूपी में मानसूनी बरसात बंगाल के खाड़ी से उठे वाला नम हवा पs आधारित बा। पूर्व से पश्चिम कावर से बढ़त एह हवा के मुख्य धारा जेने से गुजरत बा आ ओह इलाकन में सामान्य से लेके भारी बारिश होखत बा। एही मानसूनी धारा के तकनीकी भाषा में ट्रफ लाइन कहल जाला। ई जून के आखिर में अपना तय रस्ता यूपी कावर आगे बढ़ल। एही बीच उड़ीसा के दक्षिण आ आन्ध्र प्रदेश के उत्तर में कम दबाव के जबरदस्त क्षेत्र बन गइल जवन मानसूनी हवा के ओह तरफ खींचल सुरू कs देलस। मवजूदा समय उत्तर प्रदेश में बारिश के हालात बा बाकिर जवन नमी आ तापमान जरूरी होला उ नइखे बन पा रहल।

राहत के बात, कमजोर पड़ल सिस्टम

जवन दबाव के क्षेत्र मानसूनी धारा के बदल देलस ऊ अब कमजोर पड़ रहल बा। एसे ओह राज्यनो के राहत मिली जहां अत्यधिक बरखा हो रहल बा। दूसरका

ओर यूपी में बारिश के हालात बन रहल बा। दु से तीन दिन में पूर्वी उत्तर प्रदेश में बरखा सुरु भइला के उमेद बा। जदि बंगाल के खाड़ी से पर्याप्त नमी मिलत बा तs लखनऊ आ आगे तक के जिलन में एकर असर लउकी।