नई दिल्ली। कीर स्टार्मर बुध के दिने साफ-साफ कs देलें कि ईरान में चल रहल संघर्ष ब्रिटेन खातिर चुनौती बन सकेला, बाकिर यूके एह जंग में सामिल ना होई। ऊ कहलें कि ई हमनी के लड़ाई ना हs आ देस के हित में एह जंग से दूर रहे के फैसला सही बा।
स्टार्मर कहलें कि हालात चाहे केतनो गंभीर काहे ना होखे, ब्रिटेन हर चुनौती से निपटे खातिर तइयार बा। ऊ आर्थिक असर के बारे में चेतावनी देत कहलें कि एह संघर्ष के असर आम जनता पs पड़ सकेला।
होर्मुज स्ट्रेट खोलला पs जोर
ब्रिटेन पीएम जीवन-यापन के बढ़त लागत पs चिंता जतावत कहलें कि मिडिल ईस्ट में तनाव कम कइल बहुत जरूरी बा। ऊ खास तौर पs होर्मुज स्ट्रेट के दोबारा खोलला पs जोर देलें, काहे कि ई दुनिया के ऊर्जा आपूर्ति खातिर बहुत अहम रास्ता बा।
स्टार्मर कहलें कि एह दिशा में हर संभव कूटनीतिक कोसिस कइल जा रहल बा। बिदेस मंत्री आ आउर अधिकारी जी7 देसन से बात कs चुकल बाड़ें, जबकि रक्षा मंत्री मिडिल ईस्ट के सहजोगी देसन से बातचीत करत बाड़ें।
ऑस्ट्रेलियाई पीएम के बयान
एह बीच एंथनी अल्बनीज चेतावनी देले बाड़ें कि आवे वाला महीना आसान ना होई। ऊ कहलें कि ई वैश्विक संकट के असर से पूरा तरे बचल आसान नइखे, बाकिर सरकार हर संभव कोसिस करी कि देस के कम से कम नुकसान होखे।
ऊ आगे कहलें कि ई अनिश्चित समय जरूर बा, बाकिर मिलजुल के काम कइला आ एक-दूसरा के साथ देला से ई चुनौती के सामना कइल जा सकेला।
Read Also: Asian Cup Qualifiers : भारत हांगकांग के हरवलस, रेयान विलियम्स डेब्यू में मचवलें धूम
