उधमपुर। जम्मू-कश्मीर में ऊधमपुर जिला के पहाड़ी आ जंगली क्षेत्र में मंगर के एक बेर फेर सुरक्षाबल आ आतंकियन के बीच मुठभेड़ सुरू हो गइल। सूत्रन के अनुसार, सुरक्षाबलन के घेरा में जैश-ए-मोहम्मद के दु से तीन आतंकी फंसल बाड़े सs। एमे से एगो आतंकी के मारल जाये के सूचना बा, बाकिर एकर अधिकारिक पुष्टि नइखे भइल।
देर रात तक मुठभेड़ जारी रहे। सुरक्षाबलन के जिला के रामनगर आ बसंतगढ़ के बीच ऊपरी आ दुर्गम क्षेत्र चिगला बलोता में आतंकियन के संदिग्ध हलचल के सूचना मिलल। एकरा बाद सेना, सीआरपीएफ आ जम्मू-कश्मीर पुलिस संयुक्त रूप से व्यापक तलाशी अभियान सुरू कइलस। सुरक्षाबला जब आगे बढ़त रहे तs सांझ करीब चार बजे जगरेडा क्षेत्र के घना जंगल में छिपल आतंकी गोलीबारी सुरू कs देले सs। सुरक्षाबल जवाब देलस आ मुठभेड़ सुरू हो गइल।
हाई अलर्ट पs सुरक्षाबल
एकरा बाद पूरा क्षेत्र में हाई अलर्ट घोषित करत अतिरिक्त सुरक्षाबलन के मवका पs बोला लिहल गइल। रात तक दुनो ओर से रुक-रुक के गोली चलला के सूचना बा।
पुलिस आ सेना के वरिष्ठ अधिकारी मवका पs पहुंच गइल बा आ पूरा आपरेशन के निगरानी कs रहल बा। एह बीच, सेना के व्हाइट नाइट कोर बतवलस कि खुफिया सूचना के आधार पs चलावल जा रहल एह संयुक्त अभियान के आपरेशन केया नाम दिहल गइल बा।
100 से जादे अभियान जारी
गौर करे वाला बात बा कि आतंकियन के मवजूदगी के सूचना के मद्देनजर पहिलही से ऊधमपुर जिला के पहाड़ी आ जंगल क्षेत्रन में तलाशी अभियान चलावल जा रहल बा। एकरा पहिले जनवरी में कठुआ जिला में भइल मुठभेड़ में एगो आतंकी मारल गइल रहे, जबकि किश्तवाड़ के जंगल में एगो आपरेशन में सेना के एगो जवान बलिदान हो गइल रहे। पूरा प्रदेश में आतंकियन के खिलाफ एह समय करीब 100 आपरेशन चल रहल बा।
Read Also: GG vs DC : दिल्ली कैपिटल्स लगातार चउथा बेर WPL फाइनल में, गुजरात के 7 विकेट से हरवलस
