सेरेना विलियम्स के संन्यास के ऐलान से टेनिस फैंस अभी पूरा तरे उबरियो ना सकल रहल ह लो, कि अब ओह लोग खातिर एगो आउर बड़ खबर आ रहल बा। पुरुष टेनिस के महानतम खिलाड़ियन में शुमार स्विट्जरलैंड के रॉजर फेडरर अपना प्रोफेशनल करियर के विराम देवे के ऐलान कइले बाड़ें। फेडरर बियफे के ऐलान कइलें कि अगिला हफ्ता होखे वाला लेवर कप उनका करियर के आखिरी एटीपी टूर्नामेंट होई आ एकरा बाद ऊ कवनो ग्रैंड स्लैम भा टूर इवेंट में हिस्सा ना लिहें। लेवर कप के आयोजन अगिला सप्ताह 23 से 25 सितंबर ले लंदन में होई।
— Roger Federer (@rogerfederer) September 15, 2022
ओपन एरा के महानतम पुरुष खिलाड़ी मानल जाये वाला स्विट्जरलैंड के ई सुपरस्टार अपना दु दशक से लमहर प्रोफेशनल करियर में 20 ग्रैंड स्लैम सिंगल्स खिताब जीतले। ऊ एह मोकाम तक पहुंके वाला विश्व के पहिला पुरुष खिलाड़ी बनल रहस। उहे सबसे पहले पीट सैम्प्रास के 14 ग्रैंड स्लैम खिताब के विश्व रिकॉर्ड के तुरके इतिहास रचले रहस।
