Sonia Gandhi Mother Death:कांग्रेस अध्यक्ष सोनिया गांधी के मां पाओला माइनो के निधन हो गइल बा। उनकर इटली में सनीचर 27 अगस्त के निधन हो गइल रहे आ मंगर के अंतिम संस्कार कइल गइल। फिलहाल सोनिया गांधी विदेश में बाड़ी। कांग्रेस के सीनियर नेता जयराम रमेश ने सोनिया गांधी के मां के निधन के पुष्टि कइले बाड़े। ऊ ट्वीट कs के ई जानकारी देले बाड़े। सोनिया गांधी 24 अगस्त के देश से बाहर अपना इलाज खातिर गइल रहली। उनका साथे प्रियंका गांधी आ राहुल गाँधीयो गइल रहे लो।
जयराम रमेश बतवले रहस कि सोनिया गांधी इलाज के खातिर बिदेस गइल बाड़ी आ एह दौरान राहुल गांधी आ प्रियंका गांधी उनका साथे रही लो। इहे जयराम रमेश इहो बतवले रहस कि एह दौरान ऊ अपना बीमार मां के हाल जाने जइहें आ ओकरा बादे दिल्ली लवटिहे। एकर अर्थ बा कि मां के निधन से पहिले सायद सोनिया गांधी उनका से मुलाकात कइले रहली आ उनकर हालचाल जनले रहस। हालांकि अब तक सोनिया गांधी के मां के मौत आ उनकर अंतिम संस्कार के बारे में ज्यादा जानकारी सामने नइखें आइल।