स्पोर्ट्स डेस्क : विराट कोहली आ फिल सॉल्ट के 95 रन के दमदार साझेदारी के बदौलत रॉयल चैलेंजर्स बेंगलुरु (आरसीबी) कोलकाता नाइट राइडर्स (केकेआर) के ओकरे घर में हराके धमाकेदार सुरुआत कइलस। आईपीएल के 18वां सत्र के पहिला मुकाबला सनीचर के ईडेन गार्डंस पs खेलल गइल। टॉस हारके पहिले बल्लेबाजी करे उतरल गत विजेता टीम अजिंक्य रहाणे आ सुनील नरेन के शतकीय साझेदारी के दम पs 20 ओवर में आठ विकेट खोके 174 रन बनवलस। जवाब में आरसीबी 16.2 ओवर में तीन विकेट खोके 177 रन बनवलें आ सात विकेट से मुकाबला अपना नावे कs लिहल।
अर्धशतकीय पारी खेलके पवेलियन लवटलें सॉल्ट
फिल सॉल्ट आ विराट कोहली टीम के सानदार सुरुआत दिलावल लो। दुनो के बीच पहिला विकेट खातिर 95 रन के साझेदारी भइल। इंग्लैंड के स्टार बल्लेबाज मात्र 25 गेना में अपना आईपीएल करिअर के सातवां अर्धशतक पूरा कइलें आ 56 रन के दमदार पारी खेलके पवेलियन लवटलें। ऊ वरुण चक्रवर्ती के शिकार बनलें।
आरसीबी बनवलें पावरप्ले के सबसे बड़ स्कोर
एकरा पहिले सॉल्ट आ कोहली पावरप्ले में बिना कवनो नुकसान के 80 रन बनावल लो। ई आरसीबी के आईपीएल इतिहास में पावरप्ले में दूसरका सर्वोच्च स्कोर बा। आरसीबी पावरप्ले में सबसे जादे स्कोर पिछलका साल गुजरात टाइटंस के खिलाफ बनवले रहे। ओह घरी पहिला छव ओवर में एक विकेट पs 92 रन बनवले रहे। ओहिजा, आरसीबी केकेआर के खिलाफ पावरप्ले में 14 बाउंड्री लगवलस। ई तीसरका बेर बा जब आरसीबी पावरप्ले के दौरान एतना बाउंड्री लगवले बा।
कोहली दिलवले टीम के जीत
सॉल्ट के बाद बतौर इम्पैक्ट खिलाड़ी बल्लेबाजी खातिर आइल देवदत्त पडिक्कल खाली 10 रन बना सकलें। ओहिजा, कप्तान रजत पाटीदार 16 गेना में 34 रन बनाके आउट भइलें आ टीम के जीत के करीब पहुंचवलें। एह मुकाबला में किंग कोहली 30 गेना में अपना आईपीएल करिअर के 56वां पचासा पूरा कइलें। ऊ सानदार फॉर्म में नजर अइलें आ टीम के जीत दिलावे में सफल रहलें। कोहली एकरा संगही टी20 में सर्वाधिक रन बनावे वाला पांचवां बल्लेबाज बनलें आ ऊ एह ममिला में ऑस्ट्रेलिया के पूर्व सलामी बल्लेबाज डेविड वॉर्नर के पीछे छोड़लें। कोहली अपना 400वां टी20 में 59 रन बनाके नाबाद रहलें जबकि लियाम लिविंगस्टोन 15* रन बनवलें। ओहिजा, केकेआर खातिर वैभव अरोड़ा, वरुण चक्रवर्ती आ सुनील नरेन एक-एक विकेट हासिल कइल लो।
रहाणे आ नरेन दिलवलें अच्छा सुरुआत
कोलकाता के सुरुआत झटका के संगे भइल। जोश हेजलवुड पहिलके ओवर में क्विटंन डिकॉक के आपन शिकार बनवलें। ऊ खाली चार रन बना सकलें। एकरा बाद मोर्चा सुनील नरेन आ अजिंक्य रहाणे संभरलें। दुनो के बीच दूसरका विकेट खातिर 55 गेना में 103 रन के तूफानी साझेदारी भइल। कप्तान रहाणे मात्र 25 गेना में अपना आईपीएल करियर के 31वां अर्धशतक जड़लें। ऊ 31 गेना में 56 रन बनाके आउट भइलें जबकि वेस्टइंडीज के स्टार क्रिकेटर नरेन पांच चौका आ तीन छक्न के मदद से 44 रन बनवलें।
ताश के पत्तन के तरे बिखरल केकेआर के बल्लेबाजी क्रम
एकरा बाद केकेआर के पारी लड़खडवले आ ऊ गुच्छल में विकेट गंववलें। अंगकृष रघुवंशी 30, वेंकटेश अय्यर छव, आंद्रे रसेल चार, हर्षित राणा पांच रन बनवलें। ओहिजा, रमनदीप सिंह छव आ स्पेंसर जॉनसन एक रन बनाके नाबाद रहलें। आरसीबी खातिर क्रुणाल पांड्या तीन जबकि जोश हेजलवुड दु विकेट चटकवलें। एकरा अलावे यश दयाल, रसिख सलाम आ सुयश शर्मा के एक-एक सफलता मिलल।
Read Also: यूपी: सरकार के दावा, बीतल आठ सालन में साढ़े सात लाख नवहन के मिलल सरकारी नौकरी, ई बा आंकड़ां
