रेल मंत्री अश्विनी वैष्णव कांग्रेस पs लोको पायलटन के गुमराह करे के आरोप लगवलें। ऊ बुध के सोशल मीडिया पs लिखलें, लोको पायलट रेलवे परिवार के अहम सदस्य बा लो आ विपक्ष उनका के हतोत्साहित करे खातिर बहुत गलत सूचना फइला रहल बा। ऊ कहलें कि फर्जी खबरन से रेलवे परिवार के मनोबल गिरावे के कोसिस नाकाम होई। पूरा रेल परिवार देस के सेवा में एकजुट रहे।
ऊ लिखलें, लोको पायलटन के ड्यूटी घंटन के
सावधानीपूर्वक निगरानी कइल जाला। यात्रा के बाद ओह लोगन के आराम दिहल जाला। औसत ड्यूटी के घंटा निर्धारित घंटन के भीतरे रखल जाला। एह साल जून में ड्यूटी के घंटा औसत आठ घंटा से कम बा। दरअसल, बीतल हफ्ता, लोकसभा में विपक्ष के नेता राहुल गांधी लोको पायलटन के एगो समूह से मुलाकात कइले रहस। एह दौरान लोको पायलट कर्मचारियन के संख्या कम होखे से पूरा आराम ना मिल पावे के बात कहले रहे लो। एह पs राहुल उनका के आश्वासन देलें कि ऊ संसद में उनका के मुद्दा उठइहें।
विपक्षी सांसद जतावल लो चिंता
विपक्षी दलन के 17 से अधिक सांसद रेल मंत्री अश्विनी वैष्णव के पत्र लिखके ट्रेन चालकन के काम के तनाव के बारे में चिंता जाहिर कइलें। सांसदन के कहनाम बा कि काम के तनाव के चलते रेड-सिग्नल ओवरशूट के संगे दुर्घटना हो रहल बा।
