गोरखपुर : डीएवीपीजी कॉलेज, गोरखपुर में बियफे के राष्ट्रीय सेवा योजना दयानंद इकाई के तत्वावधान में प्राचार्य प्रो. शैल पांडे एवं कार्यक्रम अधिकारी प्रतिभा गुप्ता के नेतृत्व में सप्त-दिवसीय विशेष शिविर के तृतीय दिवस में साइबर सुरक्षा थीम पs आधारित कार्यक्रम आयोजित कइल गइल। एह कार्यक्रम के तहत स्वयंसेवकन आ स्वयं सेविका मुफ्तीपुर वार्ड के आसपास के इलाका में जाके रैली निकालल आ सावधान रहीं, सतर्क रहीं, साइबर सुरक्षा, जीवन रक्षा जइसन नारा लगाईं।
नुक्कड़ नाटक के भइल प्रस्तुति
एही क्रम में स्वयं सेविकन के ओर से साइबर अपराध पs आधारित नुक्कड़ नाटक प्रस्तुत कइल गइल। एह नुक्कड़ नाटक के माध्यम से लोगन के आपन ओटीपी, आधार नंबर आ अकाउंट नंबर केहूओ के शेयर ना करे के नसीहत देवे के कोसिस कइल गइल। बौद्धिक परिचरचा सत्र में साइबर क्राईम डिपार्मेंट से विनायक सिंह आ खुशबू मौर्य मुख्य अतिथि के रूप में स्वयंसेवकन आ स्वयं सेविकन के प्रोत्साहन आ मार्गदर्शन खातिर उपस्थित रहल लो।
security key के उपयोग कइल बा अनिवार्य
कार्यक्रम में मुख्य अतिथि के ओर से बतावल गइल कि जीमेल अकाउंट के सुरक्षित रखे खातिर security key के उपयोग कइल अनिवार्य बा। 1930 नंबर डायल कइला पs आ cyber crime.gov.in के मदद से रउआ साइबर पुलिस से सहायता प्राप्त कs सकत बानी। ऊ अलग-अलग प्रकार के आर्थिक अपराध जेमे mule एकाउंट्स के ओर से होखे वाला अपराध प्रमुख बा आ ओकर जिकिर कइलें। संगही ऊ बतवलें कि I-CCCC नामक संस्था साइबर क्राइम कंट्रोल खातिर लगातार प्रयासरत बानी। एही क्रम में खुशबू मौर्य के ओर से सभे के अपना व्हाट्सएप , इंस्टाग्राम आ फेसबुक अकाउंट के टू स्टेप वेरीफिकेशन के ओर से SECURE करे के नसीहत दिहल गइल।
कार्यक्रम के संचालन आ धन्यवाद ज्ञापन कार्यक्रम अधिकारी प्रतिभा गुप्ता द्वारा कइल गइल। एह अवसर पs प्रोफेसर सुबोध कुमार, डॉ. संजय कुमार श्रीवास्तव, डाॅ. संजय कुमार मिश्र, डॉ. कुलदीप द्विवेदी एवं डॉ. आसाराम वर्मा सभे स्वयंसेवकन आ स्वयं सेविकन के प्रोत्साहन खातिर उपस्थित रहे लो। एह अवसर पs आस्था, रिया, दृष्टि, अमन आ आंचल गुप्ता सहित सभे स्वयंसेवक आ स्वयं सेविका आउर कर्मचारी मेवालाल आउर राजेंद्र उपस्थित रहे लो।
Read Also: अभिषेक हत्याकांड: दूसरका Absconding ज्ञानेंद्र सिंह गिरफ्तार, मुख्य आरोपी अबो फरार
