बेतिया पुलिस अधीक्षक डी अमरकेश के निरदेस पs फरार चल रहल अपराधियन के गिरफ्तारी आ मद्य निषेध कानून के पूरा तरे लागू करावे के उद्देश्य से जिला के अलग-अलग थाना क्षेत्रन में विशेष समकालीन अभियान चलावल जा रहल बा। अपराध नियंत्रण आ विधि बेवस्था के मद्देनजर रखत मंगर के देर रात ले चलावल गइल विशेष समकालीन अभियान में जिला के अलग-अलग थाना के पुलिस 66 लोगन के गिरफ्तारी कइले बिया।
बुध के दुपहरिया इंस्पेक्टर सतीश चंद्र माधव प्रेस रिलीज जारी कs के जानकारी देत बतवलें कि पुलिस जिला के अलग-अलग थाना क्षेत्रन में छापेमारी कs के 66 लोगन के गिरफ्तार कइले बिया। एमे अनुसूचित जाति, जनजाति अत्याचार अधिनियम के तीन आरोपी, लूट के एगो आरोपी, डकैती के एगो आरोपी, आर्म्स एक्ट के दु गो आरोपी आ पुलिस पs हमला ममिलन के दु गो आरोपी सहित आउर आरोपी सामिल बाड़ें सs। इंस्पेक्टर बतवलें कि सब आरोपियन के जेल भेज दिहल गइल बा।
एह दौरान पुलिस 111 लीटर देसी शराब, 1.095 लीटर बिदेसी शराब आ तीन बाइक के जब्त कइले बिया। इंस्पेक्टर इहो बतवलें कि समकालीन अभियान के तहत वाहन जांच के दौरान यातायात नियमन के उल्लंघन करे वाला वाहन चालकन से जुर्माना के रूप में 45 हजार रुपिया वसूलल गइल बा। जिला के अलग-अलग थानन में समकालीन अभियान के तहत छापेमारी कइल जा रहल बा आ अपराधियन के दबोचल जा रहल बा।
