सिलीगुड़ी। प्रधानमंत्री नरेंद्र मोदी आज सिलीगुड़ी में एगो विशाल जनसभा के संबोधित करत भारतीय जनता पार्टी (भाजपा) के सरकार बने के भरोसा जतवले आ तृणमूल कांग्रेस (टीएमसी) पs जोरदार हमला बोललें। ऊ कहलें कि चार मई के बाद बंगाल में भाजपा के सरकार बन जाई आ टीएमसी के हर पाई-पाई के हिसाब देवे के पड़ी।
पीएम मोदी कहलें कि दार्जिलिंग आ सिलीगुड़ी के जनता हमेसा उनका के ढेर सारा प्यार देले बिया। हाल में भइल रोड शो में उमड़ल भीड़ से साफ बा कि अब बंगाल बदलाव के मन बना लेले बा। ऊ दावा कइलें कि अबकि बेर टीएमसी के सत्ता से हटल तय बा।
प्रधानमंत्री टीएमसी के 15 साल के शासन पs सवाल उठावत कहलें कि एह दौरान बंगाल के विकास ना भइल, बलुक राज्य पिछड़ गइल। ऊ नौजवान मतदाता से अपील कइलें कि जे लोग पहिला बेर वोट देवे जा रहल बा, ऊ बंगाल के भविष्य तय करे। मोदी आरोप लगवलें कि टीएमसी विकास के बदले खाली भ्रष्टाचार आ गलत काम कइले बा।
सिलीगुड़ी के नॉर्थ बंगाल के प्रवेश द्वार बतावत पीएम कहलें कि टीएमसी जान-बूझ के एह इलाका के इंफ्रास्ट्रक्चर, उद्योग आ पर्यटन के नजरअंदाज कइले बिया। केंद्र सरकार से मिलल पईसो सिंडिकेट के माध्यम से गबन हो गइल।
तुष्टिकरण के मुद्दा उठावत मोदी कहलें कि टीएमसी मदरसन खातिर हजारन करोड़ रुपिया देत बिया, बाकिर नॉर्थ बंगाल के विकास खातिर जरूरी फंड ना देत। ऊ कहलें कि जब इलाका आपदा से जूझत रहे, तब सरकार जश्न मनावत रहे।
भ्रष्टाचार पs कड़ा रुख अपनावत पीएम चेतावनी देलें कि चार मई के बाद भाजपा सरकार बनतही टीएमसी के हर एक फैसला आ खर्च के हिसाब लिहल जाई। सुरक्षा के मुद्दा पs ऊ सिलीगुड़ी कॉरिडोर के देस खातिर अहम बतवलें।
अंत में पीएम मोदी वादा कइलें कि भाजपा सरकार बनतही चाय बागान मजदूरन के पक्का घर, बिजली, पानी आ जमीन के अधिकार दिहल जाई, संगही नॉर्थ बंगाल में स्पोर्ट्स यूनिवर्सिटी बनावल जाई।
Read Also: Asha Bhosle Passes Away : 92 बरिस के उमिर में दिग्गज गायिका आशा भोसले के देहांत
