AIMIM नेता हत्याकांड ममिला में पटना कनेक्शन आइल सामने : बेऊर इलाका से चोरी भइल बाइक से घटना के देले रहे अंजाम, तीन आरोपी गिरफ्तार

गोपालगंज के नगर थाना क्षेत्र के तुरकान्हा इस्थित नहर पुल के लगे पिछला दिनन AIMIM नेता हत्याकांड ममिला में पुलिस सात नामजद आरोपियन में से तीन मुख्य आरोपी के गिरफ्तार कs के न्यायिक हिरासत में भेज देले बिया। ओहिजा आउर चार फरार नामजद आरोपियन के गिरफ्तारी खातिर छापेमारी कइल जा रहल बा। पुलिस आपसी रंजिश में हत्या के बात कहले बिया। संगही ऊ कहलस कि हत्याकांड में प्रयुक्त बरामद बाइक पटना के बेऊर थाना क्षेत्र इलाका के हs।

दरअसल, AIMIM नेता अब्दुल सलाम के हत्याकांड के बाद AIMIM नेता लोगन के पीड़ित परिजनन से मिले पहुंचे के सिलसिला जारी बा। ओहिजा, पीड़ित परिजनन से मिले खातिर AIMIM के प्रदेश अध्यक्ष आ अमनौर विधायक अख्तरुल इमान मृतक अब्दुल सलाम उर्फ असलम मुखिया के घरे पहुंचलें। एह दौरान ऊ परिजनन से मुलाकात कs के पीड़ित परिवार के ढांढस बंधवलें।

ऊ कहलें कि पुलिस के 48 घंटा के अल्टीमेटम दिहल गइल बा। जदि तय समय के मोताबिक ममिला के उद्भेदन आ आरोपियन के गिरफ्तारी ना भइल तs हमनी के चुप बा बइठेम सs। विरोध प्रदर्शन कइल जाई। एने, एह ममिला में पुलिस अधीक्षक स्वर्ण प्रभात बतवलें कि AIMIM नेता अब्दुल सलाम हत्याकांड ममिला में मृतक के बेटा अनस सलाम सात लोगन के नामजद आरोपी बनवलें बाड़ें।

दिहल गइल आवेदन के आधार पs तीन नामजद जवना में मो. सुकुल, मो. अदूद आ मो.फिरोज के गिरफ्तार कइल गइल बा। जबकि चार आउर नामजद चौराव पंचायत के मुखिया परवेज आलम उर्फ छोटे मुखिया, भाई लालबाबू, लाल बाबू के बेटा आ होटल संचालक सद्दाम सामिल बा, जे फरार बा। एसपी नबरामद बाइक के ममिला में कहलें कि बरामद बाइक पटना के बेऊर इलाका के हs जवन चोरी भइल रहे। ओहि चोरी के बाइक से हत्याकांड के अंजाम दिहल गइल। ऊ बतवलें कि रेलवे क्रॉसिंग बंद होखला के वजह से बाइक छोड़के अपराधी पैदले फरार हो गइल रहलें सs।