संसद के शीतकालीन सत्र हंगामा के भेंट चढ़ गइल। संसद सत्र के सुरुआत हंगामा के संगे भइल रहे। पहिले अदाणी ममिला, फेर जाॅर्ज सोरोस आ एकरा बाद आंबेडकर मुद्दा पs हंगामा भइल। एकर असर संसद के कामकाज पs पड़ल। एह सत्र में राज्यसभा में खाली 40.03 फीसदी काम भइल। जबकि लोकसभा के हाल कुछ अइसने रहल बा, लोकसभा में मात्र 57.87 फीसदी काम भइल।
राज्यसभा में सुक के एक देस एक चुनाव विधेयक खातिर बन रहल जेपीसी में राज्यसभा के 12 सांसदन के नामित कइल गइल। एकरा बाद सदन के कार्यवाही अनिश्चितकाल खातिर स्थगित कs दिहल गइल। सबेरे जब राज्यसभा में कार्यवाही सुरू भइल तs विपक्ष प्रदर्शन कइलस। एकरा बाद सदन के कार्यवाही कुछ देर खातिर स्थगित कs दिहल गइल। एकरा बाद सभापति सदन के नेता जेपी नड्डा आ विपक्ष के नेता मल्लिकार्जुन खरगे के संगे बैठक कइलें। एह दौरान ऊ बिना कवनो हंगामा के सदन चलावे खातिर कहलें। जब सदन के कार्यवाही 12 बजे फेर से सुरू भइल तs सभापति विधि मंत्री अर्जुन राम मेघवाल से एक देस एक चुनाव विधेयक के लेके बन रहल जेपीसी खातिर उच्च सदन से सदस्यन के नामित करे के प्रस्ताव रखे खातिर कहलें। जेपीसी खातिर 12 सदस्यन के नामित करे के प्रस्ताव के ध्वनिमत से पारित कs दिहल गइल।
एकरा बाद अपना समापन भाषण में सभापति जगदीप धनखड़ कहलें कि एह सत्र में खाली 40.03 फीसदी काम हो सकल। पूरा सत्र में मात्र 43 घंटा 27 मिनट काम हो सकल। ऊ कहलें कि सांसद के तौर पs देस के लोग हमनी के कड़ा आलोचना कs रहल बा। ई सहियो बा काहेकि लगातार हो रहल बेवधान लोकतांत्रिक संस्थानन में जनता के विश्वास के लगातार कम कs रहल बा।
लोकसभा से एक देस एक चुनाव विधेयक के जेपीसी के भेजल गइल
केंद्रीय गृह मंत्री अमित शाह के बयान के लेके हो रहल हंगामा के बीच लोकसभा से सुक के एक देस एक चुनाव से जुड़ल दुगो विधेयकन के संयुक्त संसदीय समिति (जेपीसी) के भेजल गइल। सदन के कार्यवाही के दौरान विपक्षी सांसद नारेबाजी कइल लो। एह दौरान स्पीकर ओम बिरला कानून मंत्री अर्जुन राम मेघवाल से संविधान (129वां संशोधन) विधेयक 2024 आ केंद्र शासित प्रदेश कानून (संशोधन) विधेयक 2024 के संसद के संयुक्त समिति के भेजे के प्रस्ताव पेश करे के कहलें। हंगामा के बीच प्रस्ताव के ध्वनिमत से पारित कs दिहल गइल। एकरा बाद लोकसभा के अनिश्चितकाल खातिर स्थगित कs दिहल गइल।
