PAK vs ZIM, T20 WC 2022: बियफे के रात पाकिस्तान के शर्मनाक हार के बाद जिम्बाब्वे के राष्ट्रपति पाकिस्तान के ट्विटर प ट्रोल कइलें रहस। अब उनका ट्वीट के जवाब पाकिस्तान के प्रधानमंत्री शहबाज शरीफ देले बाड़े। पाकिस्तानी पीएम के कहनाम बा कि उनका लगे असली मिस्टर बीन त नइखें हो सकत, बाकिर उनका लगे असली क्रिकेट भावना जरूर बा।
पाकिस्तान के प्रधानमंत्री शहबाज शरीफ ट्वीट करत लिखलें
‘हमनी के लगे असली मिस्टर बीन नइखें हो सकत, बाकिर हमानी के लगे असली क्रिकेट भावना बा .. आ हमनी पाकिस्तानियन के वापसी करे के एगो अजीब आदत ह। मिस्टर प्रेसिटेंड बधाई होखे। राउर टीम आज वास्तव में निम्मन खेलल।’
बता दीं, जिम्बाब्वे के राष्ट्रपति पाकिस्तान के हार के बाद अपना ट्वीट में मिस्टर बीन के मेंशन करत एगो ट्वीट कइलें रहस। ऊ लिखलें रहस
‘जिम्बाब्वे खातिर का जीत बा! शेवरॉन के बधाई। अगिला बेर असली मिस्टर बीन भेजs।
का हs ‘मिस्टर बीन’ विवाद
पाकिस्तान बनाम जिम्बाब्वे मैच से पहिले मिस्टर बीन विवाद चरचा में आइल। पाकिस्तान क्रिकेट बोर्ड 25 अक्टूबर के टीम के प्रैक्टिस सेशन के कुछ तस्वीर पोस्ट कइलें रहे। जवना प जिम्बाब्वे के एगो फैन कमेंट कइले रहे। फैन लिखले रहे…
‘जिम्बाब्वेवासियन के रूप में हमनी के रउआ लोगिन के माफ ना करेंम… एक बेर रउआ लोग हमनी के मिस्टर बीन रोवन के बजाय फ्रॉड पाक बीन देले रही… हमनी के ममिला के सुलझा लेम बस प्रार्थना कर के बा कि बरखा रउआ के बचा लेव।’
Ngugi Chasura नाम के एह फैंन के ई ट्वीट मैच से पहिले खूब वायरल भइल आ जब जिम्बाब्वे ई मैच जीत गइल त उनकर राष्ट्रपति एकरा के अपना ट्वीट में मेंशन कइलें। खबरन के मानी त 2016 में पाकिस्तान जिम्बाब्वे में परफॉर्म करे खातिर एगो फेक मिस्टर बीन भेजले रहे, ई फेक मिस्टर बीन स्थानीय लोगन से ओह दौरान पईसो लेले रहे।
मात्र 1 रन से हारल पाकिस्तान
बात मुकाबला के करी त पाकिस्तान के बियफे के पर्थ स्टेडियम में खेलल गइल आईसीसी टी20 वर्ल्ड कप 2022 के एगो मुकाबला में जिम्बाब्वे के हाथन 1 रन से हार के सामना करे के पड़ल। हार के बाद पाकिस्तान के टीम टूर्नामेंट से बाहर हाेखे के कगार प पहुंच गइल बिया। जिम्बाब्वे पहिले बैटिंग करत 8 विकेट प 130 रन के स्कोर बनवलस आ फेर पाकिस्तान के 20 ओवर में 8 विकेट प 129 रन प रोक देलस।