भारत-चीन तनाव: भारतीय जवान एको इंच ना हिलल लोग, भारत-चीन झड़प के गूंज संसद में दी सुनाई

भारत आ चीन के सैनिकन के बीचे एक बेर फेर वास्तविक नियंत्रण रेखा (एलएसी) पर संघर्ष भइल बा। दुनो देसन के सेना अरुणाचल प्रदेश के तवांग सेक्टर में आमने-सामने आ गइल रहे।जानकारी के मोताबिक 9 दिसंबर के चीनी पीएलए सैनिकन आ भारतीय सैनिकन के बीचे तवांग सेक्टर में संघर्ष भइल जवना के बारे में जानकारी 12 दिसंबर के सामने आइल।

बतावल जा रहल बा कि संघर्ष के तुरंत बाद दुनो पक्ष इलाका से पीछे हट गइल बा। चीनी पीएलए सैनिकन के संख्या लगभग 300 रहे जवन भारी तइयारी के संगे आइल रहले सs, ओकनी के उम्मेद ना रहे कि ओकनी के सामना करे खातिर भारतीय सैनिक पूरा तरे से तइयार होई लोग। भारतीय सैनिक चीनी सैनिकन के करारा जवाब दिहल लोग। घायल चीनी सैनिकन के संख्या भारतीय सैनिकन के तुलना में बेसी बा। एह संघर्ष के गूंज आज संसद में सुनाई दे सकत बा।

आम आदमी पार्टी (आप) के सांसद राघव चड्ढा 9 दिसंबर के अरुणाचल प्रदेश के तवांग सेक्टर में भारत-चीन सैनिकन के बीचे भइल संघर्ष पर राज्यसभा में नियम 267 के तहत सस्पेंशन ऑफ बिजनेस नोटिस देले बाड़ें।

सदन में ममिला पर चरचा करे खातिर स्थगन प्रस्ताव

कांग्रेस सांसद सैयद नासिर हुसैन अरुणाचल प्रदेश के तवांग सेक्टर में भारत-चीन गतिरोध पर चरचा खातिर नियम 176 के तहत राज्यसभा में छोट अवधि के चरचा के नोटिस देहले बाड़ें। पार्टी के सांसद मनीष तिवारी सदन में ममिला पर चरचा खातिर लोकसभा में स्थगन प्रस्ताव के नोटिस देले बाड़ें। अरुणाचल प्रदेश के तवांग सेक्टर में LAC पर चीनी सैनिकन के संगे झड़प में घायल भइल भारतीय सैनिकन के असम के गुवाहाटी में एगो सैन्य अस्पताल में भर्ती करावल गइल बा।

असदुद्दीन ओवैसी के सरकार पर हमला

ममिला के लेके AIMIM प्रमुख असदुद्दीन ओवैसी कहलें हs कि ई काहे भइल आ हमनी के फौजियन के हालत कइसन बा आ का सरकार सरकार सर्जिकल स्ट्राइक करी? ई सब सरकार के बतावे के चाहीं। एहिसे हमनी के सदन में स्थगन प्रस्ताव ले आएम सs। देश के जमीन के ममिला हs ना की राजनीतिक मुद्दा। ऊ कहलें कि झड़प 9 के भइल रहे। जब संसद के सत्र चलत रहे त सरकार संसद में ओही दिन काहे नाइ बतवलें ? हमके अपने सेना पर पूरा भरोसा बा लेकिन सरकार के कमजोर नेतृत्व बा कि ऊ चीन के नाव ले नाइ लेनें। एह पर सदन में चर्चा होखे के चाही।

भारतीय जवान एक्को इंच नाइ हिलनें

एन्ने अरुणाचल-पूर्व से BJP MP तपीर गाव कहले बानें कि 9 दिसंबर के अरुणाचल प्रदेश के तवांग में PLA अउर भारतीय सेना के बीच झड़प भइल अउर एहमें हमनी के सेना घायल भइल रहे लेकिन PLA में ज्यादा लोग घायल भइल बानें। सीमा पर तैनात भारतीय जवान एक्को इंच नाइ हिलनें। अब स्थिति ठीक बा, ई जौन भइल ऊ निंदनीय बा।