इस्तीफा ना, आखिरी गेना ले लड़ेम- इमरान

अविश्वास प्रस्ताव के चलते मुस्किलात के सामना कs रहल पाकिस्तान के बियफे के साँझ के देस के आवाम के संबोधित कइले। ऊ कहले- एह मुल्क के फसीला अतवार के होई। नतीजा चाहे जवन होखे हम आखिरी गेना तक मुक़ाबला करेम, हार ना मानेम।

भावुक कs देवे आला संबोधन में इमरान कहले- 22 करोड़ लोग हमार सबसे बड़ जिम्मेवारी बा। अतवार के ई पाता लागी कि का मुल्क ओहि गुलाम नीति आ भ्रष्ट लोगन कावर जाई भा हमरा संगे चली। केहु हमरा से कहल कि इस्तीफा दे दs। जे लोग हमरा संगे क्रिकेट खेलत रहे ऊ जानत बा, हम आखिरी गेना ले मुकाबला करेनी। हम कबो हार ना मानेनी। वोट के जवन कवनो नतीजा होखे, हम ओकरा बाद आउर मजबूती से आयेम। हम चाहत बानी कि समूचा कौम देखो कि के जाके अपना जमीन के सौदा करत बा।

इमरान खान इहो कहले कि हम आजाद विदेस नीति के बात कहनी, बाकिर ओकर माने कवनो देस के विरोध ना रहे। हमार विदेस नीति भारत विरोधी ना रहे।