मशरक में सड़कन प लागल महाजाम, सड़क प उतरलें मढ़ौरा एस डी पी ओ, जाम से दिलवले छुटकारा

मशरक (सारण)/धर्मेंद्र कुमार सिंह: मशरक में सनीचर के भिनसुहार सबेरही मशरक महम्मदपुर एस एच 90 पथ प मशरक थाना क्षेत्र के कर्ण कुदरिया गोलंबर प ट्रकन के जाम से मशरक आ राजापटी कोठी प जाम लाग गइल।

महाजाम में राहगीरन के बहुत फजीहतन के सामना करे के पड़ल। हनुमानगंज से डूमरशन तक एस एच 90 मार्ग प लगभग चार घंटा तक महाजाम के इस्थिति बनल रहल। जाम के कारण मुख्य पथ एस एच 90 के सड़कन प वाहनन के लमहर कतार लाग गइल।

ओहिजा जाम के खबर मिलते मढ़ौरा एस डी पी ओ इंद्रजीत बैठा दल बल के संगे मशरक के सड़क प उतरके खुद आवागमन चालू करवावे में लागल रहलें। मवका प मशरक थानाध्यक्ष रितेश कुमार मिश्रा दल बल के साथ मवजूद रहलें।

जाम अइसन रहल कि मशरक बाजार इस्थित महावीर चौक प आवे जाये वाला लोगन के बहुते दिक्कतन के सामना करे के पड़ल। पुलिस जाम छोड़वावे खातिर कड़ा मशक्कत में जुटल रहल। सड़क प आवागमन चालू होखला प आम लोग राहत के सांस लेलस।