हिमाचल प्रदेश विधानसभा चुनाव खातिर भाजपा 62 उम्मीदवारन के सूची जारी क देले बिया। मुख्यमंत्री जयराम ठाकुर सिराज से आ अनिल शर्मा मंडी से मैदान में उतरिहें। सतपाल सिंह सत्ती ऊना से चुनाव लड़िहें। हिमाचल प्रदेश में 12 नवंबर के चुनाव होखे वाला बा।
रउआ के बता दीं कि हिमाचल प्रदेश विधानसभा चुनाव में पार्टी प्रत्याशियन के चयन खातिर दिल्ली में राष्ट्रीय अध्यक्ष जगत प्रकाश नड्डा के अध्यक्षता में भाजपा संसदीय बोर्ड के मैराथन बैठक मंगर देर रात तक चलल रहे। बैठक में प्रधानमंत्री नरेंद्र मोदी आ केंद्रीय गृह मंत्री अमित शाह शामिल भइल लो। मोदी-शाह एक-एक सीट प मंत्रणा कइल लो।
एंटी इनकमबेंसी के वजह से तीन मंत्रियन आ एक दर्जन विधायकन के टिकट प तलवार लटक गइल बा, जबकि दु मंत्रियन के विधानसभा सीट बदले प चरचा भइल बा। केंद्रीय चुनाव समिति देर रात तक सब टिकटन प फसीला ले लेले रहे। भाजपा बुध के सबेरे 62 सीट के प्रत्याशियन के सूची जारी क देले बिया।
एह बैठक में रक्षा मंत्री राजनाथ सिंह, केंद्रीय मंत्री भूपेंद्र यादव, सर्वानंद सोनोवाल, भाजपा प्रदेशाध्यक्ष सुरेश कश्यप, मुख्यमंत्री जयराम ठाकुर, भाजपा के राष्ट्रीय उपाध्यक्ष सौदान सिंह, भाजपा प्रभारी अविनाश राय खन्ना, सह प्रभारी संजय टंडन, केंद्रीय सूचना आ प्रसारण मंत्री अनुराग ठाकुर सहित कइयन गो प्रादेशिक नेता मवजूद रहे लो। एह बैठक में प्रदेश चुनाव समिति के दु चरणन में भइल बैठकन प मंथन कइल गइल।
Post Views: 18
