दाउदपुर (सारण)। नई दिल्ली से दरभंगा जा रहल क्लोन स्पेशल ट्रेन (02570) सोमार के भोर में एगो बड़ दुर्घटना से बाल-बाल बच गइल। ट्रेन के एसी थ्री टियर कोच बी-7 में अचानक आग लाग गइल, जवना से अफरा-तफरी मच गइल।
ई घटना दाउदपुर रेलवे स्टेशन के लगे भइल, जहां सतर्क रेलकर्मी आ स्थानीय कर्मचारी लोग के फुर्ती से आग पs काबू पा लिहल गइल। सुखद बात ई रहल कि केहू के जान-माल के नुकसान ना भइल।
चलत ट्रेन के पहिया में उठल आग के लपट
जानकारी के मोताबिक, दाउदपुर स्टेशन के लगे ट्रेन गुजरत घरी बी-7 कोच के पहिया में धुआं उठे लागल। स्टेशन पs तैनात गेटमैन 62 सी गेट के धुआं आ चिंगारी देखके तुरंते स्टेशन मास्टर फिरोज खान के खबर देलें।
स्टेशन मास्टर फुर्ती देखावत कंट्रोल रूम के सूचित कइलें आ ट्रेन के दाउदपुर स्टेशन पs रोकवा दिहल गइल। ट्रेन के सबेरे 7:42 बजे रोकल गइल। रेलकर्मी फायर एक्सटिंग्विशर आ पानी के मदद से आग पs काबू पा लिहल लोग।
यात्रियन में भगदड़, बाकिर इस्थिति नियंत्रण में
जइसही बोगी से धुआं उठल, यात्रियन में हड़कंप मच गइल। लोग सीट छोड़के बाहर दउड़ पड़ल। स्टेशन पs अफरा-तफरी के माहौल बन गइल, बाकिर रेलकर्मी आ स्थानीय लोग मिलके इस्थिति संभाल लिहल।
सब यात्रियन के सुरक्षित बाहर निकालल गइल आ आग बुझावे के काम सुरू भइल। करीब आधा घंटा बाद आग पूरा तरे से बुझा दिहल गइल। रेलकर्मी लोगन के तत्परता से एगो बड़ हादसा टल गइल।
समय रहते बच गइल सइयन यात्रियन के जान
आग पs काबू पावे के बाद ट्रेन के तकनीकी जांच खातिर कुछ देर स्टेशन पs रोकल गइल। सब कोच के सुरक्षा जांच के बाद ट्रेन के सबेरे 8:10 बजे दरभंगा खातिर रवाना कs दिहल गइल। यात्रियन खातिर स्टेशन पs पेयजल आ सहायता कर्मी के बेवस्था कइल गइल।
रेल प्रशासन के कहनाम बा कि सुरुआती जांच में आग लगला के कारण पहिया में ब्रेक बाइंडिंग भा तकनीकी घर्षण हो सकेला। सटीक कारण पता करे खातिर जांच टीम गठित कs दिहल गइल बा।
रेल प्रशासन देलस जांच के आदेस
पूर्वोत्तर रेलवे के अधिकारी बतवलें कि घटना के गंभीरता देखत जांच के आदेस दे दिहल गइल बा। सब एसी कोच के तकनीकी जांच के निरदेस दिहल गइल बा ताकि आगे अइसन हादसा ना हो सके। रेल प्रशासन सतर्क कर्मी के तत्परता आ सजगता के सराहना कइले बा लोग।
