आजमगढ़ अउरी रामपुर लोकसभा उपचुनाव: आज साँझ के थमी प्रचार, 23 के मतदान

उत्तर प्रदेश के रामपुर आ आजमगढ़ लोकसभा सीटन पs हो रहल उपचुनाव खातिर चल रहल प्रचार आज थम जाई। बियफे 23 जून के मतदान होखे के बा।

By Anurag Ranjan On Jun 21, 2022

आजमगढ़ आ रामपुर लोकसभा के खाली सीटन पs हो रहल उपचुनाव खातिर चल रहल परचार मंगर 21 जून के साँझ के थम जाई। पुलिस प्रशासन सुरक्षित, स्वतंत्र आ शांतिपूर्ण मतदान सम्पन्न करवावे खातिर एह दुनों जिलन से लागल जिलन के सीमा पs चौकसी बढ़ा देले बा।

रामपुर के सीट सपा के मोहम्मद आजम खां आ आजमगढ़ के सीट सपा प्रमुख अखिलेश यादव 2019 में भइल लोकसभा चुनाव में जीतले रहस। एह साल 2022 में भइल विधान सभा चुनाव में मोहम्मद आजम खां रामपुर से आ अखिलेश यादव मैनपुरी के करहल विधानसभा सीट से जीतल रहस। एकरा बाद ई दुनों नेता लो लोकसभा के सदस्यता से इस्तीफा दे देले रहे लो। एह वजह से ई दुनों सीट खाली चलत रहे।

भाजपा आजमगढ़ से भोजपुरी फिल्म अभिनेता दिनेश लाल यादव निरहुआ के मैदान में उतरले बिया। बरिस 2019 में भइल लोकसभा चुनाव में निरहुआ सपा प्रमुख अखिलेश यादव से भइल मुकाबला में हार गइल रहस। सपा एह सीट पs सपा प्रमुख अखिलेश यादव के चचेरा भाई धर्मेन्द्र यादव के उम्मीदवार बनवले बिया जबकि बसपा इहां से पूर्व विधायक आ कारोबारी शाह आलम उर्फ गुड्डू जमाली के प्रत्याशी घोषित कइले बिया। जमाली अबकी बेर भइल विधान सभा चुनाव में ओवैसी के पार्टी आल इण्डिया मजलिस-ए-इत्तेहादुल मुस्लमीन के टिकट पs चुनाव लड़ल रहस बाकिर ऊ हार गइल रहस।

दूसरी ओर रामपुर से सपा उम्मीदवार असीम राजा पिछला चार दशकन से आजम खां के सहयोगी रहल बाड़े जबकि भाजपा इहां से घनश्याम लोधी ले प्रत्याशी बनवले बिया। बसपा इहां आपन उम्मीदवार नइखे उतरले। रामपुर में भाजपा प्रचार के कमान संसदीय कार्य आ वित्त मंत्री सुरेश खन्ना के सउपले बिया। आजमगढ़ में प्रचार के जिम्मा कृषि मंत्री सूर्य प्रताप शाही के दिहल गइल बा। दूसरा ओर एह दुनों जिलों में शराब, बीयर आ भांग के दुकानन के बंद करवा दिहल जाई जवन बियफे 23 जून के साँझ के मतदान सम्पन्न होखला के बादे खुल सकी।