स्पोर्ट्स डेस्क। भारत पाकिस्तान (IND vs PAK) के हराके एशिया कप 2025 के खिताब पs कब्जा कs लेलस। टीम इंडिया 2023 में वनडे फॉर्मेट में कप जीतले रहे आ अब 2025 में टी20 फॉर्मेट में आपन दबदबा साबित कइलस। ई जीत भारत खातिर खास रहल, काहें कि पूरा टूर्नामेंट में ऊ अजेय रहल।
भारत टॉस जीत के पहिले गेंदबाजी के फैसला कइलस। कुलदीप यादव के जादुई गेंदबाजी से पाकिस्तान 19.1 ओवर में 146 रन पs ढेर हो गइल। कुलदीप अकेला 4 विकेट झटकलें, जबकि बुमराह, वरुण चक्रवर्ती आ अक्षर पटेल दू-दू विकेट लिहल लोग। पाकिस्तान खातिर साहिबजादा फरहान 57 रन आ फखर जमां 46 रन बनवलें, बाकिर उनकर पारी टीम के बचा ना सकल।
लक्ष्य के पीछा करत भारत के सुरुआत खराब रहल। अभिषेक शर्मा, शुभमन गिल आ कप्तान सूर्यकुमार यादव मात्र 20 रन पs आउट हो गइल लोग। एह से भारत के पारी संकट में आ गइल। बाकिर तिलक वर्मा क्रीज पs डट गइलें आ धीरे-धीरे मैच भारत के ओर खींच लेलें।
संजू सैमसन तिलक के संगे मिलके 57 रन के साझेदारी कइलें। भलही ऊ 24 रन पs आउट हो गइलें, बाकिर टीम के संभार देलें। बाद में शिवम दुबे मैदान पs उतर के तिलक के संगे जिम्मेदारी से खेललें आ 33 रन ठोकलें।
मैच के रोमांच आखिरी ओवर में पहुंचल। भारत के 6 गेना पs 10 रन चाहत रहे। तिलक आ रिंकू सिंह क्रीज पs रहे लोग। तिलक पहिला गेना पs 2 रन, दूसरका गेना पs छक्का आ तीसरका गेना पs सिंगल ले लेलें। स्कोर बराबरी पs आ गइल। चउथका गेना पs रिंकू सिंह विजयी चौका लगवलें आ भारत 19.4 ओवर में 150 रन बना के कप अपना नामे कs लेलस।
एह जीत पs पूरा टीम इंडिया खुसी से झूम उठल। कोच गौतम गंभीर, खिलाड़ी आ दर्शक लोग झंडा लहरावत जश्न मनवलें। तिलक बल्ला लहरावत जीत के जश्न मनवलें, जबकि पाकिस्तानी खिलाड़ी मायूस नजर आइल लोग।
एह टूर्भामेंट में भारत खातिर पाकिस्तान पs ई लगातार तिसरका जीत रहल। तिलक वर्मा के नाबाद 69 रन आ कुलदीप यादव के 4 विकेट भारत के ऐतिहासिक खिताब दिलवलस।
Read Also : Arrah News : आक्रांत बाबा के 96वीं जयंती पs स्मृतिग्रंथ के भइल विमोचन
