एक ओर देश के कई राज्यन में जाड़ा खटखटावे लागल बा तs दोसरा ओर कई राज्यन में भइल भारी बरखा से लोग के जिनगी बाधित हो गइल बा.एकरा अलावे वायु प्रदूषण भी फइलल शुरू हो गईल बा। एक ओर दिल्ली, यूपी अवुरी बिहार में जाड़ा के मौसम शुरू हो गईल बा, तs दोसरा ओर महाराष्ट्र, तमिलनाडु अवुरी आंध्र प्रदेश में भारी बरखा शुरू हो गईल बा। बरखा के चलते लोग के जिनगी मुश्किल होखत लउकत बा। तमिलनाडु के चेन्नई में आजु सबेरे से भारी बरखा हो रहल बा. एकरा के देखत तमिलनाडु के सगरी स्कूल आ कार्यालय आजु बंद बा. साथही आंध्र प्रदेश में सरकार 17 अक्टूबर ले एक साथ छुट्टी घोषित कs दिहले बिया.
17 अक्टूबर ले बंद स्कूल
बता दीं कि आंध्र प्रदेश के कई जिला में लगातार भारी बरखा हो रहल बा, जवना के चलते राज्य सरकार प्रभावित इलाका के स्कूल, कॉलेज अवुरी बाकी शैक्षणिक संस्थान में छुट्टी घोषित कs देले बिया। आदेश जारी करत सरकार कहलस कि तिरुपति, चित्तूर, नेल्लोर अवुरी प्रकाशम जईसन अवुरी जिला के स्कूल 17 अक्टूबर 2024 ले बंद रही।
अलर्ट जारी कइल गइल
आईएमडी आवे वाला बियफ़ें ले आंध्र प्रदेश में भारी से बहुत भारी बरखा के अलर्ट जारी कईले बिया। एकर कारण बा बंगाल के खाड़ी के दक्खिनी हिस्सा में बनल कम दबाव वाला सिस्टम जवन मजबूत होके तट के ओर बढ़े के अनेसा बा, जवना से राज्य भर में भारी बरखा होखे के संभावना बा। आईएमडी के अलर्ट के मुताबिक बियफ़ें ले कृष्णा, बापटला, नेल्लोर, प्रकाशम, तिरुपति अवुरी चित्तूर जईसन जिला में भारी बरखा होखे के संभावना बा, जवना में हवा के गति 65 किलोमीटर प्रति घंटा ले पहुंच जाई। एकरा अलावे श्री सत्यसाई, अन्नामैया अवुरी वाईएसआर जिला में बहुत भारी बरखा के संभावना बा।
Comments are closed.