देवरिया के सांसद, डीएम, एसपी आ सीडीओ सभे आईआईटीयन 

 

वर्तमान में देवरिया जिला में अइसन संजोग बा कि एहिजा के शीर्ष अधिकारी आईआईटीियन बाड़े. एतने ना देवरिया के सांसद भी आईआईटी के उपज हवे। जिला के डीएम, एसपी अवुरी सीडीओ जहां आईआईटी से पढ़ाई कईले बाड़े, उहें देवरिया के सांसद शशांक मणि त्रिपाठी भी आईआईटी के उपज हवे। मानल जाता कि आईटीआईएन के अधिकारी के जोड़ी से जिला के विकास के एगो नाया आयाम मिली। जिला डीएम दिव्या मित्तल, एसपी संकल्प शर्मा आ सीडीओ प्रत्युष पाण्डेय, तीनो लोग आईआईटी कइले बा.

खास बात ई बा कि एह सब के सोच सकारात्मक बा आ ओह लोग के एके गो लक्ष्य जिला के विकास बा. देवरिया जिला के इतिहास में शायद पहिला बेर अइसन शुभ संजोग तब होला जब आईआईटी के सगरी उत्पाद जिला के शीर्ष पद पs पोस्ट हो जाला. अयीसना में बहुत दिन से विकास के इंतजार करत जिला के लोग के उम्मीद में काफी बढ़ोतरी भईल बा।

सांसद शशांक मणि त्रिपाठी आईआईटी दिल्ली से बीटेक 

देवरिया लोकसभा क्षेत्र के सांसद शशांक मणि त्रिपाठी आईआईटी दिल्ली से बीटेक के पढ़ाई कइले बाड़न. रचनात्मक सोच से भरपूर शशांक एगो साहित्यकार, राजनीतिज्ञ आ सामाजिक उद्यमी हउवें. इहाँ के जागृति यात्रा आ जागृति इंटरप्राइज सेंटर पूर्वांचल के संस्थापक भी बानी। देवरिया के विकास पs उनुकर खास ध्यान बा अवुरी एकरा खातीर एगो मॉडल भी तैयार कईले बाड़े। शशांक जागृति इंटरप्राइजेज के माध्यम से सैकड़ों युवा के रोजगार देले बाड़े।

डीएम दिव्या मित्तल भी आईआईटी दिल्ली से बीटेक

देवरिया के डीएम दिव्या मित्तल भी आईआईटी दिल्ली से बीटेक कइले बाड़ी। उs आईआईएम बंगलौर से एमबीए भी कईले बाड़ी। सिविल सेवा में शामिल होखे से पहिले उs लंदन के जेपी मॉर्गन जईसन एगो प्रतिष्ठित बहुराष्ट्रीय कंपनी में काम कईले रहली। दिव्या मित्तल के तेज आ ईमानदार आईएएस अधिकारी मानल जाला। देवरिया आवे से पहिले संत कबीर नगर आ मिर्जापुर के डीएम रहली। उहाँ उs अपना काम के चलते एगो खास पहचान बनवले रहली।

एसपी संकल्प शर्मा आईआईटी रुड़की से एम.टेक 

देवरिया के पुलिस अधीक्षक संकल्प शर्मा भी आईआईटी के उत्पाद हवे। उs आईआईटी रुड़की से एम.टेक कईले बाड़े। भारतीय पुलिस सेवा में शामिल होखे से पहिले उs आईटी सेक्टर में रहले। संकल्प शर्मा के गिनती तेज अवुरी ईमानदार पुलिस अधिकारी में होखेला। उs पुलिस विभाग में अपना अभिनव प्रयोग खातिर जानल जाले। पिछला साल देवरिया जिला में फतेहपुर घटना आ अग्निवीर योजना के खिलाफ विरोध प्रदर्शन पs ऊ बहुते समझदारी से काबू में कs लिहले रहले.

सीडीओ प्रत्युष कानपुर आईआईटी 

देवरिया जिला के मुख्य विकास अधिकारी प्रत्युष पाण्डेय कानपुर आईआईटी से स्नातक कइले बाड़न. उs अहमदाबाद आईआईएम से एमबीए भी कईले बाड़े। प्रत्युश पहिला प्रयास में यूपीएससी के परीक्षा पास कइले बलुक 21वां रैंक वाला टॉपर के सूची में भी शामिल भइले.