राजू श्रीवास्तव के निधन पर भावुक भइलें सांसद रवि किशन, बोलले- हम एगो भाई खो दिहलीं

कॉमेडियन राजू श्रीवास्तव के बुध के निधन हो गइल बा। उनके 10 अगस्त के जिम में वर्कआउट कइले के दौरान दिल के दौरा पड़ल रहे, जेकरे बाद उनके एम्स में भर्ती करवावल गइल रहे। बीतल 41 दिन से वेंटिलेटर पर मौत से जंग लड़ रहल राजू श्रीवास्तव बुध के बिहाने आपन देह छोड़ देहलें। राजू श्रीवास्तव के मौत के खबर सोझे अइले के बाद से ही पूरे देश में शोक के लहर दौड़ गइल बा। हर केहू भीजल आंख से राजू के श्रद्धांजलि दे रहल बा।

उहवें सांसद रवि किशन कहलें कि ई बहुत बड़ क्षति बा। कामेडी जगत खातिर, एक कलाजगत खातिर अउरी राजनीति के क्षेत्र में भी। ऊ हर क्षेत्र में शानदार काम करत रहने। उनकर पूरा परिवार के संगे ई देश के अपूरणीय क्षति बा। ऊ एगो निम्मन पिता,निम्मन पुत्र, निम्मन पति अउरी एगो निम्मन मित्र रहलें।

उन कहलें कि आजु हम उनके मौत से ठकुआ गइल बानीं। हम आपन भाई खोअले बानीं। हम लोग 30 साल से एक दूसरे के सुख-दु:ख में सहभागी रहनी जा। मुंबई में शुरुआती दिन में उनकरो संघर्ष चलत रहे अउर हमरियो भी। हमनीके दूनों से बहुत समय संगे बीतल बा। उम्मीद नाइ रहल कि उ एतना जल्दी हमनी के छोड़ के चल जइहें।