राजस्थान के जोधपुर में रमजान पs निकालल गइल विवादित बिजली आदेश से एगो आदमी एतना खफा भइल कि सीएम अशोक गहलोत के धमकी दे देहलस। युवक सोशल मीडिया के जरिए सीएम के लेके एगो धमकी भरल पोस्ट कइले बा। मामला सामने अइले पर पुलिस आदमी के गिरफ्तार कs लेहलस।
पुलिस से मिलल जानकारी के अनुसार आरोपी राकेश सिंह शेखवात 47 साल के बा। ऊ सीकर के रहे वाला बा अउर जोधपुर के एगो फैक्ट्री में काम करत बा। मंगलवार के ऊ सोशल मीडिया पर लिखलस कि ‘कौनो राजपूत जिंदा होखे जौन हमके रिवॉल्वर दे सके, गहलोत के सबक सिखावे के बा’। आरोपी के एह पोस्ट के वायरल भइले के बाद रातानाड़ा थाना पुलिस ओके गिरफ्तार कर लेहलस।
आरोपी राकेश पुलिस से कहलस कि सरकार के दिवाली-नवरात्र पs बिजली कटौती के लेके त कौनो चिंता नाइ होला| रमजान में बिजली नाइ कटे के चाहीं, एह तरे के आदेश देखकर ओके खीस बर गइल अउर सोशल मीडिया पर पोस्ट कs देहलस। ऊ कहलस कि हमार कौनो गलत इरादा नाइ रहल, हमरे लग्गे त कौनो हथियारो नाइ बा।
