Lसुभासपा के राष्ट्रीय अध्यक्ष ओम प्रकाश राजभर NDA में सामिल हो गइल बाड़ें। सनीचर के गृहमंत्री अमित शाह से ऊ दिल्ली में मुलाकात कइलें। सूत्रन के मोताबिक, राजभर योगी कैबिनेट में मंत्री पद, यूपी में 3 लोकसभा सीट आ बिहार में 1 लोकसभा सीट पs चुनाव लड़े के शर्त रखले बाड़ें। एमे घोसी आ चंदौली सीट सामिल बा।
NDA के हिस्सा बनला के बाद राजभर अतवार के ट्वीट कs के जानकारी देलें। राजभर आजे सुभासपा कार्यकारिणी बैठक करे जा रहल बाड़े। मानल जा रहल बा कि एह दौरान उनकर पार्टी सीटन के लेके नया सिरा से रणनीति तय करी।
2019 में NDA से अलग भइल रहस
2019 लोकसभा चुनाव से पहिले भाजपा आ सुभाषपा के गठबंधन टूट गइल रहे। जवना के वजह ई बतावल गइल रहे कि गाज़ीपुर सीट से अमित शाह चाहत रहलें कि उनका पार्टी के सिंबल पs चुनाव लड़स बाकिर राजभर लगातार अपना सिंबल पs चुनाव लड़ावे के जिद पs अड़ल रहस।
एकरा बाद विधानसभा चुनाव 2022 राजभर सपा प्रमुख अखिलेश यादव के संगे मिलके लड़लें। चुनाव नतीजा आइल आ यूपी में योगी सरकार दोबारा बनला के बाद राजभर अखिलेश से किनारा कs लेलें। गृहमंत्री अमित शाह से 1 महीना में 2 बेर मुलाकात के बाद उनकर BJP ज्वॉइनिंग के लेके कयास लगावल जा रहल बा।
गाजीपुर सीट से अरुण राजभर हो सकते बाडें प्रत्याशी
अइसन अटकल लगावल जात रहे कि राजभर के बेटा अरुण राजभर के गाजीपुर से प्रत्याशी बनावल गइला के ऐलानो कइल जा सकत बा। गाजीपुर लोकसभा के सीट माफिया मुख्तार अंसारी के भाई अफजाल अंसारी के लगे रहे। बाकिर गैंगस्टर ममिला में 4 साल के सजा के बाद उनकर सांसदी चल गइल। सीट खाली हो गइल। जवना पs जल्दिये उपचुनाव के घोषणा कइल जाई।
अइसन नेता, जे बयानन के लेके रहेलें चरचा में
सुभासपा अध्यक्ष ओपी राजभर हमेशा अपना बयानन के लेके चरचा में रहत बा। एक बेर ऊ कहलें रहस कि सरकार में अइला के बाद ऊ अइसन कानून बनइहें, जवना के तहत स्कूल ना भेजे वाले माई-बाबूजी के जेल भेज दिहल जाई।
