भारतीय कुश्ती महासंघ (डब्ल्यूएफआई) के बड़ राहत मिलल बा आ खेल मंत्रालय महासंघ पs लगावल निलंबन तत्काल प्रभाव से हटा लेले बा। डब्ल्यूएफआई में पिछला कुछ बरिसन से विवाद चलत रहे आ खेल मंत्रालय के एह फैसला के बाद विवाद खत्म होखे के आसार नजर आ रहल बा।
कवना कारण लागल रहे निलंबन?
खेल मंत्रालय संजय सिंह के अगुआई वाली डब्ल्यूएफआई के कार्यकारी समिति पs खेल संहिता के उल्लंघन के आरोप के चलते निलंबन लगावल गइल रहे। कुश्ती के वैश्विक संस्था यूनाइटेड वर्ल्ड रेसलिंग (यूडब्ल्यूडब्ल्यू) पिछला साल संजय सिंह के अगुआई वाली डब्ल्यूएफआई से निलंबन हटा देले रहे। एकरा बाद भारतीय ओलंपिक संघ (आईओए) भारत में कुश्ती के दैनिक कार्य देख रहल भूपेंद्र सिंह बाजवा के नेतृत्व वाला तदर्थ समिति के भंग करे के निर्णय लेले रहे। डब्ल्यूएफआई के कार्यकारी समिति के अध्यक्ष संजय सिंह के भलही यूडब्ल्यूडब्ल्यू आ आईओए से राहत मिल गइल रहे, बाकिर केंद्र सरकार से उनका राहत मिले के इंतजार रहे जवन अब जाके पूरा भइल। सरकार डब्ल्यूएफआई पs नियमन के उल्लंघन के हवाला देत कार्रवाई कइल गइल रहे आ चुनाव संपन्न होखला के तीन बाद डब्ल्यूएफआई के निलंबित कs दिहल गइल रहे।
डब्ल्यूएफआई के पूर्व अध्यक्ष बृजभूषण शरण सिंह के करीबी संजय सिंह के नेतृत्व वाली समिति 21 दिसंबर 2023 के चुनाव जीतले रहे। एकरा बाद ऊ अंडर-15 आ अंडर-20 वर्ग के राष्ट्रीय चैंपियनशिप करावे के घोषणा कइले रहे। हालांकि, एह चैंपियनशिप के आयोजन स्थल गोंडा के नंदिनी नगर में रखल गइल रहे जवन बृजभूषण के गढ़ हs। ई बात सरकार के चुभल रहे। खेल मंत्रालय 24 दिसंबर 2023 के कार्रवाई करत डब्ल्यूएफआई के निलंबित करे के फैसला कइले रहे।
15 महीना बाद हटल निलंबन
डब्ल्यूएफआई के निलंबन के कारण पहलवानन के कइयन तरे के मुसीबतन के सामना करे के पड़ल रहे। एह वजह से महासंघ आ खेल मंत्रालय के बीच टकराव के इस्थिति पैदा हो रहल बा, जवना के सबसे जादे नुकसान पहलवानन के भइल। हालांकि, निलंबन हटला से घरेलू टूर्नामेंट आयोजित करे के रास्ता खुल गइल रहे आ अंतरराष्ट्रीय टूर्नामेंट के चयन खातिर अब दुविधा ना होई। मंत्रालय अपना आदेस में बतवलें कि डब्ल्यूएफआई सुधारात्मक कदम उठवले बा, जवना के कारण ओकरा पs लागल निलंबन के हटावल जात बा। खेल मंत्रालय एह तरे करीब 15 महीना बाद डब्ल्यूएफआई पs लागल निलंबन हटावल।
Read Also: Share Market : अमेरिकी मंदी के डर से निवेशकन में दहशत; सेंसेक्स 400 अंक गिरल, निफ्टियो लुढ़कल
