भारत के स्टार बैटर सूर्यकुमार यादव आईसीसी के ताजा टी20 रैंकिंग में दुनिया के नंबर वन बल्लेबाज बन गइल बानें। ऊ एह मामिला में पाकिस्तान के मोहम्मद रिजवान के पीछे छोड़ दिहलें। ताजा आईसीसी रैंकिंग में सूर्यकुमार के 863 रेटिंग पॉइंट बानें। उहवें रिजवान के 842 रेटिंग पॉइंट बा। सूर्यकुमार रिजवान पर 21 रेटिंग पॉइंट के बढ़त बना के रखले बानें।
सूर्यकुमार एह साल टी20 में शानदार फॉर्म में दिखल बानें। उ एह साल ओवरऑल एह फॉर्मेट में सबसे ज्यादा रन बनावे वाले बल्लेबाज भी बानें। ऊ साल 2022 में अब ले (बांग्लादेश के खिलाफ मैच से पहिले) 27 मैच में 42.50 के औसत अउर 183.69 के स्ट्राइक रेट से 935 रन बनवलें बानें। सूर्यकुमार एह साल एक शतक भी लगवले बानें। ऊ एह साल इंग्लैंड के खिलाफ 117 रन के पारी खेलले रहनें। एह साल सूर्यकुमार टी20 अंतरराष्ट्रीय में एक शतक अउर आठ अर्धशतक लगवले बानें।
मोहम्मद रिजवान सूर्यकुमार के बाद लिस्ट में दूसरे नंबर पर बानें। ऊ एह साल 21 मैच में 123.84 के स्ट्राइक रेट से 888 रन बनवले बानें। उहवें, तीसरे नंबर पर जिम्बाब्वे के सिकंदर रजा बानें। रजा एह साल 23 टी20 मैच में 151.40 के स्ट्राइक रेट से 701 रन बनवले बानें। एह साल टी20 अंतरराष्ट्रीय में सबसे ज्यादा रन बनावे वालन में विराट कोहली चौथे स्थान पर बानें। कोहली एह साल 18 मैच में 140.08 के स्ट्राइक रेट अउर 55.33 की औसत से अब ले 664* रन बनवले बानें।
| खिलाड़ी | मैच | रन | स्ट्राइक रेट |
|---|---|---|---|
| सूर्यकुमार यादव (IND) | 27 | 935 | 183.69 |
| मोहम्मद रिजवान (PAK) | 21 | 888 | 123.84 |
| सिकंदर रजा (ZIM) | 23 | 701 | 151.40 |
| विराट कोहली (IND) | 18 | 664 | 140.08 |
| पाथुम निसांका (SL) | 23 | 646 | 110.23 |
| ग्लेन फिलिप्स (NZ) | 17 | 627 | 155.97 |