हिंदी सिनेमा के दिग्गज गायिका आशा भोसले के जीवनी ‘स्वरस्वामी आशा’ शुक के दिने एगो कार्यक्रम में विमोचन भइल. आशा भोसले के जीवनी के विमोचन समारोह में कई सितारा शामिल भइले. एह आयोजन में आरएसएस प्रमुख मोहन भागवत, बॉलीवुड अभिनेता जैकी श्रॉफ से लेके सोनू निगम तक के कई सितारा शामिल भइले. एह आयोजन के एगो वीडियो अब सोशल मीडिया पs वायरल हो रहल बा. वीडियो में गायक सोनू निगम कुछ अइसन करत लउकत बाड़न जवना से सभकर दिल जीत लिहलस. उनुकर प्रशंसक अवुरी सोशल मीडिया यूजर सोशल मीडिया पs सोनू निगम के खूब तारीफ करतारे।
सोनू निगम आशा ताई के गोड़ धो दिहले
दरअसल एह आयोजन के दौरान आशा भोसले जइसहीं मंच पs अइली, सम्मान के निशानी के रूप में सोनू एह दिग्गज गायक के गोड़ धो दिहलन. ऊ आशा भोसले के गोड़ गुलाब के पंखुड़ी से धो दिहलन आ फेर सजदा कs के एह दिग्गज गायिका के गोड़ छुअले. सोनू निगम के ई वीडियो सोशल मीडिया पs खूब देखल जा रहल बा। न्यूज एजेंसी एएनआई सोनू निगम अवुरी आशा भोसले के इs वीडियो एक्स (पहिले ट्विटर) पs शेयर कईले बिया, जवना में, सोनू निगम के गायिका आशा भोसले के बगल में फर्श पs बईठल देखल जा सकता अवुरी उs उनुकर गोड़ धोवत बाड़े।
सोनू निगम आ आशा ताई के वीडियो
वीडियो शेयर करत एएनआई कैप्शन में लिखले बा कि – ‘गायिका आशा भोसले के जीवनी के लॉन्चिंग के दौरान गायिका सोनू निगम गायिका आशा भोसले के गोड़ धो के आपन सम्मान अवुरी आभार जतावले।’ क्लिप में देखल जा सकेला कि सोनू निगम हंसत-हँसत आशा भोसले के गोड़ धोवत बाड़े आ फेर god लागत बाड़े. ई सब देख के खुद आशा ताई हैरान बाड़ी आ साथे-साथे खुश लउकत बाड़ी।
प्यार आ सम्मान मिलला के बाद आशा भोसले भावुक हो गईली
एह दौरान सोनू निगम आशा ताई के आपन ‘गुरु’ भी बतवले अवुरी इहो कहले कि उनुका गायन से प्रेम के श्रेय उनुका से मिलेला। सोनू कहले कि आशा भोसले के मार्गदर्शन में संगीत के नींव रखले बानी। सोनू निगम आ अउरी सितारन से मिलल एह प्यार आ सम्मान के देखला के बाद आशा भोसले तनी भावुक हो गइली आ एकरा खातिर आपन प्यार भी जतवली. आशा भोसले के साथे उनकर परिवार के लोग भी एह कार्यक्रम में देखल गइल, जवना में पंडित हृदयनाथ मंगेशकर, सुरेश वाडकर, सुदेश भोसले, भारती मंगेशकर, अशोक सराफ, श्रुति भोसले आ हरीश भिमानी शामिल बाड़े।
