पटना रेलवे स्टेशन पs ट्रेनन के इंतजार कर रहल सइयन यात्रियन के ओह समय अजीब इस्थिति के सामना करे के पड़ल जब तीन मिनट तक सभे टीवी स्क्रीन पs पॉर्न वीडियो चले लागल। ई वीडियो स्टेशन के सब लेटफॉर्म पs तीन मिनट तक चलल। घटना अतवार के रात के हs।
वीडियो आ फिल्मन के प्रसारण के ठेका एगो निजी कंपनी के दिहल गइल बा। रेलवे सुरक्षा बल (आरपीएफ) के अधिकारी लोग तुरंत ओकरा से संपर्क कइल आ प्रसारण बंद करावल।
घटना के पुष्टि करत दानापुर इस्थित डीआरएम कार्यालय के आधिकारिक प्रवक्ता प्रभात कुमार कहलें, हमनी घटना के जांच सुरू कs देले बानी सs आ ठेका रद्द करे के प्रक्रियो सुरू कs देले बानी सs। हमनी के कंपनी के अधिकारियन के खिलाफ प्राथमिकी दर्ज कs लेले बानी सs.. एकरा के बर्दाश्त नइखे कइल जा सकत। हमनी के कंपनी के ब्लैकलिस्ट कs देले बानी सs।
सूत्र लोग बतावल कि एही तरे के घटना अतवार के सबेरहू एही रेलवे स्टेशन पs भइल रहे।
