Lalan Singh Resign: राष्ट्रीय अध्यक्ष के पद से ललन सिंह दिहले इस्तीफा, नीतीश कुमार अब संभलीहें कमान

 

दिल्ली में जेडीयू के राष्ट्रीय कार्यकारिणी के बैठक से बड़ खबर सामने आ रहल बा। जेडीयू के राष्ट्रीय अध्यक्ष ललन सिंह अपना पद से इस्तीफा दे दिहले बाड़न। अब सवाल उठत बा कि का नीतीश कुमार पार्टी के जिम्मा सम्हारिहें? ई खबर भी कुछ समय बाद सामने आ जाई। हालांकि ललन सिंह अबे ले इस्तीफा के कारण नईखन बतवले।

एह बइठक खातिर दिल्ली पहुंचल जेडीयू के नेता कार्यकर्ता के कहनाम बा कि हमनी के फैसला लेवे वाला अपना नेता के संगे बानी। बिहार ही ना देश के नजर नीतीश कुमार पs बा।

ललन सिंह के राष्ट्रीय अध्यक्ष पद से इस्तीफा दिहला के बाद अब नीतीश कुमार जिम्मेवारी सम्हार लिहले बाड़न। दिल्ली में जेडीयू कार्यकर्ता जोश में नारा लगवले।

‘नीतीश कुमार जइसन देश के पीएम होखे के चाहीं’।कार्यकर्ता लोग के कहनाम बा कि नीतीश कुमार अवुरी ललन सिंह में कवनो अंतर नईखे। एकरा के बदल दिहल गइल बा काहे कि देश में लोकसभा चुनाव होला। भारत गठबंधन के मजबूरी हs कि उ लोग नीतीश कुमार के संगे ले जाए।

बता दीं कि सबसे पहिले राष्ट्रीय कार्यकारिणी के बइठक हो चुकल बा। कुछ समय बाद राष्ट्रीय परिषद के बइठक आजु खुद शुक के दिने होखी। राष्ट्रीय परिषद के बइठक में एह सगरी प्रस्तावन के मंजूरी मिल जाई। नीतीश कुमार 2003 के बाद जनता दल यूनाइटेड के पांचवा राष्ट्रीय अध्यक्ष होईहे। पहिला बात कि शरद यादव 2016 तक जेडीयू के राष्ट्रीय अध्यक्ष रहले। एकरा बाद नीतीश कुमार राष्ट्रीय अध्यक्ष बनले। नीतीश कुमार के बाद आरसीपी सिंह के इs जिम्मेदारी दिहल गईल। फेर आरसीपी सिंह के बाद ललन सिंह के राष्ट्रीय अध्यक्ष बनावल गइल। अब नीतीश कुमार दूसरा बेर जेडीयू के राष्ट्रीय अध्यक्ष बने जा रहल बाड़े।