नई दिल्ली। संयुक्त राष्ट्र (UN) के आतंकवाद-विरोधी निगरानी टीम लाल किला के लगे भइल धमाका के ममिला में बड़ खुलासा कइले बा। यूएन के रिपोर्ट में बतावल गइल बा कि एगो सदस्य देस जानकारी देलस कि आतंकी संगठन जैश-ए-मोहम्मद दिल्ली के ऐतिहासिक लाल किला पs भइल हमला के जिम्मेदारी खुद स्वीकार कइले बा। एह खुलासा के बाद पाकिस्तान एक बेर फेर अंतरराष्ट्रीय मंच पs बेनकाब हो गइल बा।
यूएन के रिपोर्ट में इहो कहल गइल बा कि जैश-ए-मोहम्मद आपन रणनीति बदल रहल बा। संगठन के सरगना मसूद अजहर ‘जमात-उल-मुमिनात’ नाम से एगो खास महिला आतंकी विंग के गठन कइले बा। एह विंग के मकसद आतंकी गतिविधियन में महिला के भर्ती आ समर्थन बढ़ावल बतावल गइल बा।
लाल किला हमला में जैश-ए-मोहम्मद के भूमिका
असल में जैश-ए-मोहम्मद भारत के निशाना बनाके आतंकी गतिविधि चलावे के लमहर इतिहास रखेला। यूएन के ताजा रिपोर्ट के मोताबिक, एगो सदस्य देस के खुफिया जानकारी में ई बात सामने आइल बा कि जैश कइयन गो हमला के जिम्मेदारी ले चुकल बा। एमे 9 नवंबर के नई दिल्ली के लाल किला के लगे भइल हमला सामिल बा, जवना में 15 लोग मारल गइल रहे।
यूएन के रिपोर्ट में कहल गइल बा कि 8 अक्टूबर के जैश-ए-मोहम्मद के मुखिया मसूद अजहर औपचारिक रूप से ‘जमात-उल-मुमिनात’ नाम के महिला शाखा के गठन के ऐलान कइले रहे। एह नया शाखा के साफ मकसद आतंकवादी हमला में मदद पहुंचावल बा। ई बात संगठन के भरती आ ऑपरेशन रणनीति में बदलाव के संकेत देला।
यूएन के चेतावनी
संयुक्त राष्ट्र के निगरानी दल चेतावनी देलस कि लगातार दबाव के बादो जैश-ए-मोहम्मद जइसन आतंकी संगठन नया तरीका से खुद के ढाल रहल बाड़ें। कबो नया भर्ती मॉडल तs कबो प्रतीकात्मक आ हाई-प्रोफाइल हमला के जरिये ई संगठन आपन मवजूदगी साबित करे में लागल बा।
रिपोर्ट में इहो कहल गइल बा कि कुछ आतंकी संगठन कमजोर भइल होखे, बाकिर खुद के दोबारा संगठित करे आ बड़ लक्ष्य पs हमला करे के क्षमता अबहियो क्षेत्रीय आ अंतरराष्ट्रीय सुरक्षा खातिर गंभीर खतरा बनल बा।
अंतरराष्ट्रीय आतंकवाद पs कार्रवाई में रुकावट
यूएन के निगरानी दल इहो बात उजागर कइले बा कि आतंकवाद पs अंतरराष्ट्रीय कार्रवाई काहे कमजोर पड़ जात बा। कुछ देस जैश-ए-मोहम्मद के आजो सक्रिय आ खतरनाक मान रहल बाड़ें, जबकि कुछ सदस्य देस एह संगठन के निष्क्रिय बतावत बा। एह तरे के अलग-अलग आकलन खुफिया तंत्र आ जमीनी कार्रवाई में कमजोरी के साफ इशारा करेला।
Read Also: iPhone यूजर्स खातिर iOS 26.3 अपडेट आ नया फीचर, पूरा डिटेल आ डाउनलोड करे के तरीका
