स्पोर्ट्स डेस्क : दिल्ली कैपिटल्स आईपीएल 2025 (IPL 2025) खातिर नया कप्तान के ऐलान होली के दिन कइले बा। फ्रेंचाइजी अबकी बेर अक्षर पटेल के कप्तानी के जिम्मेदारी सउपले बा, जे 2019 से दिल्ली के हिस्सा बाड़ें। कप्तान के दउड़ में केएल राहुल के नाम रहे, बाकिर टीम अक्षर पटेल पs भरोसा जतवलस। IPL 2025 के सुरुआत 22 मार्च से होई आ दिल्ली के नया कप्तान के तौर पs अक्षर पटेल के ई पहिला सीजन होई।
ऋषभ पंत के जगह कप्तान बनलें अक्षर
अक्षर पटेल दिल्ली कैपिटल्स के पूर्व कप्तान ऋषभ पंत के जगहा पs ई जिम्मेदारी संभरिहें। पंत अब लखनऊ सुपरजाएंट्स के हिस्सा बाड़ें आ पिछला कुछ समय से दिल्ली के कप्तान के लेके अटकल लगावल जात रहे। अक्षर आ केएल राहुल दिल्ली के कप्तान बने के प्रमुख दावेदार रहे लो। राहुल पिछला सीजन तक लखनऊ सुपरजाएंट्स के कप्तान रहस आ अब ऊ दिल्ली कैपिटल्स खातिर खेलिहें। दिल्ली फ्रेंचाइजी होली के दिन अक्षर के ई जिम्मेदारी सउप के फैंस के एगो अच्छा तोहफा देले बा। दिल्ली कैपिटल्स अभी लेआईपीएल के खिताब नइखे जीत सकल आ अब अक्षर के सामने टीम के पहिला आईपीएल खिताब दियावे के चुनौती होई।
दिल्ली ने पंत को किया था रिलीज, राहुल को खरीदा
दिल्ली कैपिटल्स एह सीजन टीम में कइयन गो बदलाव कइले बा। लमहर समय तक टीम के हिस्सा रहल ऋषभ पंत के रिलीज कs दिहल गइल, जवना से जुड़ल चरचा बहुत दिनन तक रहल रहे। पंत के मेगा नीलामी में लखनऊ सुपरजाएंट्स 27 करोड़ रुपिया में किनले रहे। ओहिजा, दिल्ली केएल राहुल के 14 करोड़ रुपिया में किनले रहे आ तब से ई कयास लगावल जात रहे कि राहुल के दिल्ली के कप्तानी मिल सकत बा। बाकिर, फ्रेंचाइजी अक्षर पटेल के कप्तानी के जिम्मेदारी देले बा।
अक्षर पटेल के कप्तानी अनुभव
अक्षर पटेल के टी20 में कप्तानी के अच्छा खासा अनुभव बा। ऊ 2018 से 2024 तक बड़ौदा के टी20 टीम के कप्तानी कइले रहस, जेमे बड़ौदा 16 मैचन में से 10 मैच जीतले रहे। एकरा अलावे, 12 मई 2024 के ऊ दिल्ली कैपिटल्स के कप्तानी कइले रहस, जब दिल्ली आरसीबी के खिलाफ मैच खेलले रहे, हालांकि दिल्ली ऊ मुकाबला 47 रन से हार गइल रहे। अक्षर पटेल टी20 में 36.40 के औसत से 364 रन बनवले बाड़ें, जेमे उनकर सर्वोच्च स्कोर 57 रन बा। गेंदबाजी में उनकर प्रदर्शन सानदार रहल बा, ऊ 13 विकेट चटकवले रहस।
अक्षर पटेल 2019 से दिल्ली कैपिटल्स के हिस्सा बाड़ें आ आईपीएल 2025 खातिर दिल्ली उनका के 16.50 करोड़ रुपिया में रिटेन कइले रहे। अब, अक्षर पटेल दिल्ली कैपिटल्स के संगे अपना सातवां सत्र में टीम के कप्तानी करिहें। दिल्ली अक्षर के एह महत्वपूर्ण भूमिका खातिर चुनले बिया, जबकि राहुल के पहिला बेर टीम में सामिल कइल गइल बा। अक्षर पटेल अब तक आईपीएल में 150 मैच खेलले, जेमे लगभग 131 के स्ट्राइक रेट से 1653 रन बनवले बाड़ें आ 7.28 के इकोनामी रेट से 123 विकेट लेले बाड़ें।
