गोरखपुर : दीनदयाल उपाध्याय गोरखपुर विश्वविद्यालय के 75वीं वर्षगांठ पs हीरक जयंती समारोह के लेके तइयारियन के सिलसिला जोरन पs बा। बियफे के विश्वविद्यालय के कुलपति प्रोफेसर पूनम टंडन प्रेस वार्ता में समारोह के भव्यता आ ओकर महत्व के बारे में जानकारी देलें। ऊ कहलें कि आयोजन ना खाली विश्वविद्यालय खातिर, बलुक पूरा गोरखपुर परिक्षेत्र खातिर एगो महत्वपूर्ण आ उत्सव के बात हs। ई समारोह जेतना विश्वविद्यालय के बा, ओतनही गोरखपुर क्षेत्राे के हs।
कुलपति कहली कि एह वर्षगांठ समारोह के लेके विश्वविद्यालय के उद्देश्य ई नइखे कि खाली विश्वविद्यालय के लोग, बलुक गोरखपुर के नागरिक समाजो एमे सक्रिय रूप से भाग लीं। ऊ बतवलें कि गोरखपुर के जादेतर परिवारन से कवनाे ना कवनो सदस्य गोरखपुर विश्वविद्यालय के पुरातन छात्र बा लो, एह लिहाज से ई पूरा शहर एगो विशाल विश्वविद्यालय परिवार के हिस्सा हs।
कइयन गो प्रतियोगितन के होई आयोजन
कुलपति बतवली कि एह उत्सव के तहत विश्वविद्यालय के ओर से सेमिनार, सांस्कृतिक प्रतियोगिता, खेल स्पर्धा आा पुरातन छात्र सम्मेलन आयोजित कइल जाई। एकरा अलावे, प्राइमरी से लेके इंटर स्कूल तक के लईकन खातिर अलग-अलग प्रतियोगितन के आयोजन कइल जाई। ई प्रतियोगिता पहिले ब्लॉक स्तर पs आ फेर जिला स्तर पs आयोजित कइल जाई। विजयी प्रतिभागियन के मुख्य समारोह के दौरान राज्यपाल द्वारा सम्मानित कइल जाई।
सर्वाइकल कैंसर वैक्सीनेशन के पहल
समाजिक जिम्मेदारी के तहत कुलपति कहली कि उनकर सबसे महत्वपूर्ण जोगदान सर्वाइकल कैंसर वैक्सीनेशन कार्यक्रम होई, जवना में लक्ष्य 2000 लईकियन के वैक्सीनेट कइल बा। एकरा खातिर 10 कस्तूरबा स्कूलन के लइकियन के चिह्नित कइल गइल बा। एह कार्यक्रम के सुभारंभ राज्यपाल के गरिमामय उपस्थिति में कइल जाई। गोरखपुर के प्रतिष्ठित नागरिक शिवशरण दास 50 लईकियन के वैक्सीनेशन के जिम्मेदारी लेले बाड़ें। एह पहल के गोरखपुर से लेके देवरिया आ कुशीनगर तक बढ़ावल जाई।
75 साल के गौरवगाथा आ सांस्कृतिक कार्यक्रम
विश्वविद्यालय के 75 बरिसन के ऐतिहासिक यात्रा के प्रदर्शित करे खातिर एगो भव्य प्रदर्शनी आयोजित कइल जाई। एकरा संगही छात्रन के बीच खेल आ सांस्कृतिक प्रतियोगिता चल रहल बा। प्रोफेसर सुरेंद्र दुबे के नाटक ‘उठो अहिल्या’ के मंचन होई। कुलपति बतवली कि एह पूरा साल के दौरान विश्वविद्यालय के 75 बरिस पूरा होखला पs कुल 75 कार्यक्रम आयोजित कइल जाई।
विशिष्ट स्मृति चिह्न आ डाक टिकट के विमोचन
एह समारोह के तहत विश्वविद्यालय के ओर से स्मारिका, डाक टिकट, कॉफी टेबल बुक आ विशेष एलुमिनाई (पुरातन विद्यार्थियन) के सम्मानित कइल जाई। एकरा अलावे, एगो सोवेनीयर शॉप स्थापित कइल जाई, जहां विश्वविद्यालय के गौरवशाली 75 बरिसन से जुड़ल बा। स्मृति चिह्नन के किनल जा सकी।
T20 क्रिकेट मैच के होई आयोजन
विश्वविद्यालय एह समारोह में महाविद्यालयन के एमे सामिल कइल गइल बा, जेमे लगभग 12 लाख छात्र-छात्रा बा लो। एगो T20 क्रिकेट मैच शिक्षक आ कर्मचारियन के बीच आयोजित कइल जाई आ जदि पत्रकारन के टीम तइयार होत बिया तs शिक्षक आ पत्रकारन के बीच एगो मैच होई।
समारोह के संयोजक प्रोफेसर नंदिता आईपी सिंह प्रेस वार्ता के दौरान सब पत्रकारन आ विश्वविद्यालय के अधिकारियन के स्वागत कइली आ समारोह के सफल आयोजन खातिर सभे के सुभकामना देली।
Read Also: Asteroid 2024 Yr4: चांद से टकरा सकत बा खतरनाक एस्टेरॉयड, वैज्ञानिक लोग दिहल चेतावनी
