स्पोर्ट्स डेस्क: चैंपियंस ट्रॉफी में ग्रुप-बी से सेमीफाइनल में पहुंचे के जंग दिलचस्प हो चुकल बा। बुध के अफगानिस्तान के इंग्लैंड पs जीत एह रेस के दिलचस्प बना दिहल गइल बा। इंग्लैंड के टीम ग्रुप-बी से बाहर होखे वाला पहिला टीम बनल। हालांकि, ग्रुप-बी से अभियो तीनों टीम दक्षिण अफ्रीका, ऑस्ट्रेलिया आ अफगानिस्तान सेमीफाइनल में पहुंचे के रेस में बनल बा आ तीनो के एगो जीत सेमीफाइनल में पहुंचा सकत बा। ग्रुप-ए से सेमीफाइनल के दुगो टीम पहिलही तय हो चुकल बा। न्यूजीलैंड आ भारत पहिलही चैंपियंस ट्रॉफी 2025 के सेमीफाइनल में आपन स्थान बुक कs चुकल बा, बाकिर अभी ई साफ नइखे कि एह दुनो के अपना ग्रुप में स्थान का रही। ग्रुप ए आ बी, दुनो में अभी दु-दु मैच बचल बा।
ग्रुप-ए के टेबल टॉपर के फैसला दु मार्च के
ग्रुप-ए से अंक तालिका के समीकरण दु मार्च के तय होई, जब भारत आ न्यूजीलैंड के टीम आमने-सामने होई। एह मैच से तय होई कि भारत अपना ग्रुप में शीर्ष पs रही कि दूसरका स्थान पs। ग्रुप-ए से शीर्ष पs रहे वाली टीम के सेमीफाइनल में ग्रुप-बी में दूसरका स्थान पs रहे वाली टीम से सामना होई, जबकि ग्रुप-ए में दूसरका स्थान पs रहे वाली टीम ग्रुप-बी के शीर्ष स्थान पs रहे वाली टीम से भिड़ी। ग्रुप-ए के दूसरका मैच बियफे के पाकिस्तान आ बांग्लादेश के बीच बा, बाकिर ई मैच महज औपचारिकता बा, काहेकि दुनो टीम पहिलही बाहर हो चुकल बिया।
ग्रुप-बी में दिलचस्प भइल समीकरण
ग्रुप बी के अंतिम दु मैचन में अफगानिस्तान के सामना ऑस्ट्रेलिया से होई, जबकि दक्षिण अफ्रीका के सामना इंग्लैंड से होई। जदि दक्षिण अफ्रीका आ ऑस्ट्रेलिया आपन-आपन मैच जीत जात बा, तs ऊ सेमीफाइनल खातिर क्वालिफाई कs जाई। जदि ऑस्ट्रेलिया अफगानिस्तान के हरा देत बा तs ओकरा संगे-संगे दक्षिण अफ्रीका इंग्लैंड से बिना भिड़लें क्वालिफाई कs जाई। हालांकि, जदि अफगानिस्तान ऑस्ट्रेलिया के हरा देत बा तs ऊ सेमीफाइनल में पहुंच जाई आ ऑस्ट्रेलिया के भाग्य इंग्लैंड-दक्षिण अफ्रीका के बीच मुकाबला के नतीजा पs तय होई। तब ऑस्ट्रेलिया के ई मनावे के होई कि इंग्लैंड ना खाली जीत दर्ज करे बलुक बड़ अंतर से जीत दर्ज करे ताकि ऑस्ट्रेलिया के नेट रन रेट दक्षिण अफ्रीका से बेहतर हो सके। दक्षिण अफ्रीका के नेट रन रेट फिलहाल +2.140 है, जबकि ऑस्ट्रेलिया के नेट रन रेट +0.475 बा।
सेमीफाइनल में भारत के सामना केकरा से हो सकत बा?
जदि ऑस्ट्रेलिया आ दक्षिण अफ्रीका दुनो आपन-आपन मैच जीत लेत बा आ भारत न्यूजीलैंड के हरा देत बा तs रोहित शर्मा के अगुआई वाली टीम मंगर के होखे वाला सेमीफाइनल में ऑस्ट्रेलिया से भिड़ सकत बिया। हालांकि, जदि भारत दूसरका स्थान पs रहत बा, तs ऊ एह परिदृश्य में दक्षिण अफ्रीका के सामना करीं।
दूसरका तरफ जदि अफगानिस्तान ऑस्ट्रेलिया के हरा देत बा आ दक्षिण अफ्रीका इंग्लैंड के हरा देत बा तs भारत अपना ग्रुप में शीर्ष पs रहला पs अफगानिस्तान से भिड़ी। अगर भारत न्यूजीलैंड से हार जात बा, तs ऊ एह इस्थिति में दक्षिण अफ्रीका के सामना करी।
जदि दक्षिण अफ्रीका आ ऑस्ट्रेलिया दुनो आपन मैच हार जात बा तs भारत अपना ग्रुप में दूसरका स्थान पs रहला पs अफगानिस्तान से भिड़ी। एह इस्थिति में जदि भारतीय टीम न्यूजीलैंड के हरा देत बिया आ अपना ग्रुप में शीर्ष पs रहत बिया तs ई देखे के होई कि दक्षिण अफ्रीका आ ऑस्ट्रेलिया के हरला पs दुनो में से बेहतर नेट रन रेट केकर बा। एह दुनों में से बेहतर नेट रन रेट वाली टीम दूसरका स्थान पs रहत सेमीफाइनल में पहुंची।
Read Also: 27 फरवरी 2025 के राशिफल
