भोरे थाना क्षेत्र के छोटकी सिसई गांव के एगो तालाब से 14 साल के किशोर के शव मिलल बा। पुलिस शव के पोस्टमार्टम के खातिर गोपालगंज सदर अस्पताल भेज देले बिया आ ममिला के जांच में जुट गइल बिया। बतावल जा रहल बा कि किशोर नहाये गइल, जहां डूबला के कारण ओकर मौत हो गइल।
मृतक के पहचान छोटकी सिसई गांव के रहे वाला दुखी शर्मा के 14 साल के बेटा राहुल शर्मा के रूप में कइल गइल बा। बतावल गइल बा कि गांवे के सुभाष चौहान के मौत कवनो कारण से हो गइल रहे। उनका दाह संस्कार खातिर सब लोग गइल रहे। एही बीच किशोर पोखर के लगे नहाये चल गइल। गहराई जादे होखला के कारण ऊ ओहि में डूबे लागल। एने, किशोर के घर वाला ओकर खोजबीन में जुट गइल लो। उहां मवका पs बकरी चरा रहल एगो व्यक्ति किशोर के बारे में बतवलस कि ऊ नहात रहे।
परिजन पोखर के लगे पहुंचल लो। स्थानीय गोताखोरन के मदद से ओकर तलाश कइल गइल। शव मिलतही परिजन में चीत्कार मच गइल। लोग पुलिस के सूचना दिहल जवना के बाद मवका पs पहुंचल पुलिस शव के पोस्टमार्टम खातिर सदर अस्पताल भेज देले बिया। मृतक राहुल के पिता पेशा से एगो मजदूर बाड़ें। राहुल अपना माई बाबूजी के एकलौता बेटा रहे। ऊ सातवीं कक्षा के छात्र रहे।
साभार: दैनिक भास्कर
