यात्रियन के झटका: डिब्रूगढ़ राजधानी समेत 31 ट्रेन रद्द, श्रमजीवी आ गरीबो रथ ना चलल, देखीं कैंसिल गाड़ियन के लिस्ट

अग्निपथ योजना के विरोध में चल रहल आंदोलन के कारण सनिचर के डिब्रूगढ़ राजधानी आ हिमगिरी एक्सप्रेस समेत 31 गो ट्रेन रद्द रहल। सनिचर के योजना के विरोध में बिहार बंद रहल।

By Anurag Ranjan On Jun 18, 2022

अग्निपथ योजना के विरोध में चल रहल आंदोलन के कारण सनिचर के डिब्रूगढ़ राजधानी आ हिमगिरी एक्सप्रेस समेत 31 गो ट्रेन रद्द रहल। सनिचर के योजना के विरोध में बिहारो बंद रहल। एकरा चलते उहां से चले वाला श्रमजीवी, मुजफ्फरपुर सप्तक्रांति, दानापुर-आनंद विहार, किसान एक्सप्रेस समेत तमाम प्रमुख ट्रेनन के पहिया थम गइल। संगही हिंसक प्रदर्शन के देखत रेलवे हावड़ा से चले वालन ट्रेनन के रद्द कs देलस।

रेल प्रशासन के मोताबिक आंदोलन के चलते सनिचर के मूल स्टेशनन से चले वालन ट्रेनन के रद्द कइल गइल बा। बड़ असर बिहारो बंद से रहल। बिहार के जयनगर, पटना, सहरसा,राजगीर,मुजफ्फरपुर के अलावे हावड़ा से चले वाला कइयन गो ट्रेनन के संचालन रोकल गइल बा। ट्रेनन के रद्द होखला से एक ओरि जहां यात्रियन के मुश्किल बढ़ गइल बा। ओहिजा स्टेशनन पs भीड़ बढ़ल बा। एकरा के लेके जीआरपी आ आरपीएफ के चौकसी बढ़ गइल बा।