सेंट्रल डेस्क। राज्यसभा चुनाव के तहत आज बिहार, ओडिशा आ हरियाणा के कुल 11 सीट पs वोटिंग होखे जा रहल बा। एमे बिहार के पांच सीट, ओडिशा के चार सीट आ हरियाणा के दूगो सीट सामिल बा। चुनाव के नतीजा आजे घोषित हो जाई। गौर करे लायक बात ई बा कि एह साल देस भर में कुल 37 राज्यसभा सीट खातिर चुनाव हो रहल बा, जवना में से 26 सीट पs उम्मीदवार पहिलही से निर्विरोध चुन लिहल गइल बा। अब बचल 11 सीट पs मुकाबला होखे जा रहल बा, जवन राजनीतिक दलन खातिर बहुत अहम मानल जा रहल बा।
बिहार, ओडिशा आ हरियाणा में वोटिंग से पहिले सियासी माहौल बहुते गरम हो गइल बा। खासकर बिहार में एआईएमआईएम के रुख से विपक्षी महागठबंधन उलझन में पड़ गइल बा। खबर बा कि आईआईपी आ कांग्रेस के कुछ विधायक राजग के उम्मीदवार के समर्थन कs सकेला लोग। एह कारण से राजनीतिक समीकरण तेजी से बदलत नजर आ रहल बा। ओने, ओडिशा आ हरियाणा में हॉर्स ट्रेडिंग के डर से अलग-अलग पार्टी अपना विधायक लोग के सुरक्षित जगह पs रखले बाड़ी सs, ताकि वोटिंग के समय कवनो टूट-फूट ना होखे।
बिहार में असली मुकाबला पांचवां सीट खातिर हो रहल बा, जहां भाजपा के शिवेश राम आ राजद के एडी सिंह आमने-सामने बा लोग। एह सीट पs जीत खातिर विपक्षी महागठबंधन के 35 विधायकन के एकजुट रहल बहुते जरूरी बा। संगही एआईएमआईएम के पांच विधायक आ बसपा के एगो विधायक के समर्थन चाहीं। दूसरका ओर राजग के जीत खातिर तीन गो अतिरिक्त वोट के जरूरत बा।
सनिचर के एआईएमआईएम के प्रदेश अध्यक्ष अख्तरुल ईमाम आ राजद नेता तेजस्वी यादव के बीच मुलाकात भइल, बाकिर कवनो ठोस फैसला ना निकल सकल। कुछ राजनीतिक सूत्र बतावत बा लोग कि एआईएमआईएम उपेंद्र कुशवाहा के समर्थन दे सकेला भा फेर वोटिंग से दूर रह सकेला। अगर अइसन भइल तs पांचवां सीट पs राजग के जीत के संभावना बढ़ सकेला।
हरियाणा में दुसरका सीट पs कड़ा मुकाबला देखे के मिल रहल बा। ओडिशा में भाजपा, बीजद के उम्मीदवार पs चुनावी हलफनामा में जानकारी छुपावे के आरोप लगा रहल बिया, जवन नया राजनीतिक विवाद खड़ा कs देले बा।
Read Also: 16 मार्च 2026 के राशिफल
