नई दिल्ली। ममता बनर्जी के पार्टी के पूर्व विधायक हुमायूं कबीर उनका खिलाफ मोर्चा खोल देले बाड़ें। हुमायूं कबीर के नजर मुस्लिम वोट बैंक पs बा। ऊ तृणमूल कांग्रेस (TMC) के खुला चुनौती देलें कि 2026 के चुनाव में ऊ किंगमेकर साबित हो गइलें। ओहिजा, अब हुमायूं कबीर आपन तुलना असदुद्दीन ओवैसी से कइलें बाड़ें।
हुमायूं कबीर के कहनाम बा कि ऊ बंगाल के ओवैसी हवे। ऊ दावा कइलें कि AIMIM के अध्यक्ष आ हैदराबाद के सांसद असदुद्दीन ओवैसी उनका संगे गठबंधन करे खातिर राजी हो गइलें।
हुमायूं कबीर खुद के काहे कहलें ओवैसी?
हुमायूं कबीर के अनुसार, “हम ओवैसी से बात कइनी। ओवैसी हमरा से कहलें कि ऊ हैदराबाद के ओवैसी हवे आ हम बंगाल के ओवैसी हई।”
हुमायूं कबीर आगे कहलें- हम आज 10 दिसंबर के कोलकाता जाएम आ पार्टी के कमेटी बनाएम। 22 दिसंबर के लाखन समर्थकन के संगे हम अपना नया पार्टी के नेव रखेम।
TMC के मुस्लिम वोट बैंक में लगाएम सेंध
बता दीं कि पश्चिम बंगाल में 27 प्रतिशत मुस्लिम वोट बैंक TMC के मिलेला। एकरा पs हुमायूं कबीर कहलेंं कि “हम नया पार्टी बनाएम, जवन मुस्लिमन के खातिर काम करी। 135 सीटन पs हम आपन उम्मीदवार उतारेम। ई गेमचेंजर साबित होई। TMC के मुस्लिम वोट बैंक खत्म हो जाई।”
AIMIM के होई बंगाल में एंट्री?
पश्चिम बंगाल में अगिला साल विधानसभा चुनाव होई। हुमायूं कबीर के कहनाम बा कि ऊ एह चुनाव में “किंगमेकर” के भूमिका निभइहें। बता दीं कि 2021 के विधानसभा चुनाव में ओवैसी के पार्टी AIMIM 7 सीटन पs आपन उम्मीदवार उतरले रहे, बाकिर ओकरा कवनो सीट पs जीत ना मिलल रहे। अइसन में हुमायूं कबीर के संगे गठबंधन कs के ओवैसी बंगाल में एंट्री के तइयारी करत बाड़ें।
