स्पोर्ट्स डेस्क। भारत तीसरका बेर टी20 वर्ल्ड कप के खिताब जीत लेलस। अतवार के दिन अहमदाबाद के नरेंद्र मोदी स्टेडियम में खेलल गइल फाइनल मुकाबला में भारत, न्यूजीलैंड के 96 रन से हरा देलस। भारत के ओर से संजू सैमसन, अभिषेक शर्मा आ ईशान किशन के अर्धशतकीय पारी के बदौलत टीम 20 ओवर में 5 विकेट पs 255 रन बनवलस। जवाब में न्यूजीलैंड के टीम 19 ओवर में खाली 159 रन पs सिमट गइल।
एह जीत के संगे टीम इंडिया तीन बेर टी20 वर्ल्ड कप जीते वाली पहिला टीम बन गइल। अब जानल जावs कि भारतीय टीम कब-कब आईसीसी के टूर्नामेंट जीत चुकल बिया।
1983- वनडे वर्ल्ड कप
1983 में क्रिकेट के दुनिया में सबसे बड़ उलटफेर देखे के मिलल रहे। कपिल देव के कप्तानी में भारत, लंदन के ऐतिहासिक मैदान लॉर्ड्स पs वेस्टइंडीज के हरा के पहिला बेर वर्ल्ड कप जीतलस।
भारत पहिले बल्लेबाजी करत 54.4 ओवर में 183 रन बनवले रहे। जवाब में वेस्टइंडीज के टीम 52 ओवर में 140 रन पs ऑलआउट हो गइल। भारत 43 रन से मैच जीत गइल। मोहिंदर अमरनाथ आ मदन लाल के घातक गेंदबाजी से विंडीज के मजबूत बल्लेबाजी ढह गइल रहे।
2002- चैंपियंस ट्रॉफी
साल 2002 में भारत चैंपियंस ट्रॉफी के फाइनल में श्रीलंका से भिड़ल रहे। कोलंबो में खेलल गइल ई मैच बरखा के चलते पूरा ना हो सकल। आईसीसी के नियम अनुसार भारत आ श्रीलंका के संयुक्त विजेता घोषित कइल गइल।
2007- टी20 वर्ल्ड कप
भारत 2007 में पहिला टी20 वर्ल्ड कप जीतल। महेंद्र सिंह धोनी के कप्तानी में भारत पाकिस्तान के 5 रन से हरवलस। गौतम गंभीर 75 रन के सानदार पारी खेललें। पाकिस्तान 157 रन के लक्ष्य के पीछा करत 152 रन पs रुक गइल।
2011- वनडे वर्ल्ड कप
1983 के बाद भारत 28 साल बाद फेर वनडे वर्ल्ड कप जीतल। मुंबई में खेलल गइल फाइनल में भारत, श्रीलंका के 6 विकेट से हरवलस।
श्रीलंका 274 रन बनवलस। जवाब में भारत गौतम गंभीर (97) आ धोनी (91*) के सानदार पारी से 48.2 ओवर में लक्ष्य हासिल कs लेलस। ई जीत महान बल्लेबाज सचिन तेंदुलकर खातिर यादगार विदाई बन गइल।
2013- चैंपियंस ट्रॉफी
भारत 2013 में दूसरा बेर चैंपियंस ट्रॉफी जीतलस। बर्मिंघम में खेलल गइल फाइनल में भारत 20 ओवर में 129 रन बनवलस।
शिखर धवन (31), विराट कोहली (43) आ रवींद्र जडेजा (33*) बढ़िया बल्लेबाजी कइल लोग। जवाब में इंग्लैंड के टीम 124 रन बना सकल आ भारत 5 रन से जीत गइल।
2024- टी20 वर्ल्ड कप
भारत दूसरका बेर टी20 वर्ल्ड कप जीतलस। बारबाडोस में खेलल गइल फाइनल में भारत दक्षिण अफ्रीका के 7 रन से हरवलस।
भारत 176 रन बनवलस आ दक्षिण अफ्रीका 169 रन बना सकल। एह जीत के संगे भारत 11 साल बाद आईसीसी ट्रॉफी जीतलस।
2025- चैंपियंस ट्रॉफी
2025 के चैंपियंस ट्रॉफी में न्यूजीलैंड पहिले बल्लेबाजी करत 251 रन बनवलस। जवाब में भारत 49 ओवर में 6 विकेट खोके लक्ष्य हासिल कs लेलस।
रोहित शर्मा 76 रन के कप्तानी पारी खेललें। रोहित आ शुभमन गिल पहिला विकेट खातिर 105 रन के साझेदारी कइल लाेग।
2026- टी20 वर्ल्ड कप
भारत तीसरी बेर टी20 वर्ल्ड कप जीत के इतिहास बना देलस। सूर्यकुमार यादव के कप्तानी में भारत न्यूजीलैंड के हरवलस।
अब तक कवनो टीम टी20 वर्ल्ड कप के खिताब बचा ना सकल रहे, बाकिर भारत ई कारनामा कs के नया इतिहास रच देलस।
Read Also: 09 मार्च 2026 के राशिफल
