सेंट्रल डेस्क। झारखंड के पश्चिमी सिंहभूम जिला के मझगांव प्रखंड निवासी कुख्यात अंतरराज्यीय चोर मोहम्मद नफीस सोमार के भोर में ओडिशा के क्योंझर जिला के चंपुआ थाना क्षेत्र में पुलिस मुठभेड़ के दौरान घायल हो गइल। नफीस पs झारखंड-ओडिशा सीमा इलाका में चोरी आ डकैती के 30 से जादे ममिला दर्ज रहल आ पुलिस ओकरा के बहुत दिनन से खोजत रहे।
चोरी के सामान बरामद करावे गइल रहे पुलिस
पुलिस के मोताबिक, पूछताछ के दौरान नफीस बतवले रहे कि चोरी के सामान चंपुआ के लगे पटला फॉरेस्ट में छिपा के रखल गइल बा। एह जानकारी के आधार पs सोमार के भोर में करीब 5 बजे पुलिस टीम ओकरा के सामान बरामद करावे खातिर जंगल ले गइल।
देसी बंदूक निकाल के पुलिस पs कइलस फायरिंग
पुलिस के कहनाम बा कि बरामदगी के दौरान नफीस जंगल में पहिले से छिपा के रखल देसी बंदूक निकाल लेलस आ पुलिस टीम पs दू राउंड फायरिंग कइलस। अचानक हमला कइला के बाद ऊ जंगल के फायदा उठावत भागे के कोसिसो कइलस।
जवाबी कार्रवाई में घुटना में लागल गोली
आत्मरक्षा में पुलिस जवाबी फायरिंग कइलस। एह दौरान एगो गोली नफीस के दाहिना घुटना में लागल, जवना से ऊ घटनास्थल पs गिर पड़ल। पुलिस तुरंत ओकरा के फेर अपना कब्जा में ले लेलस।
घटनास्थल से बरामद भइल देसी कट्टा
मुठभेड़ के बाद पुलिस घटनास्थल से एगो देसी बंदूक बरामद कइले बिया। घायल नफीस के पहिले चंपुआ अस्पताल ले जाइल गइल, जहां प्राथमिक इलाज के बाद बेहतर इलाज खातिर क्योंझर जिला अस्पताल रेफर कs दिहल गइल।
एह धारा में दर्ज भइल ममिला
एह घटना के संबंध में चंपुआ थाना में कांड संख्या 257/2026 दर्ज कइल गइल बा। आरोपी के खिलाफ भारतीय न्याय संहिता (BNS) के धारा 109(1) आ 296 के संगे आर्म्स एक्ट के धारा 25 आ 27 के तहत ममिला दर्ज कs के कानूनी कार्रवाई सुरू कs दिहल गइल बा।
अंतरराज्यीय गिरोह के तलाश तेज
पुलिस अब मोहम्मद नफीस के बाकी साथी, अंतरराज्यीय चोरी गिरोह आ चोरी के बाकी सामान के बरामदगी खातिर जांच तेज कs देले बिया। झारखंड-ओडिशा सीमा इलाका में सक्रिय ओकर नेटवर्क के खंगालल जा रहल बा।
पुलिस के माने के बा कि नफीस से पूछताछ के दौरान चोरी आ डकैती से जुड़ल कइयन गो आउर बड़ ममिला के खुलासा हो सकेला।
